ബീഹാര് ബിഹാറില് നിതീഷ് കുമാര് വീണ്ടും മുഖ്യമന്ത്രിയായി സത്യപ്രതിജ്ഞ ചെയ്തു. ബിജെപിയുമായുള്ള സഖ്യം ഉപേക്ഷിച്ച് ആര്ജെഡി-കോണ്ഗ്രസ്-ഇടതു സഖ്യത്തിനൊപ്പം ‘മഹാസഖ്യം’ പ്രഖ്യാപിച്ച നിതീഷ് കുമാര് എട്ടാം തവണയാണ് മുഖ്യമന്ത്രിയായി സത്യപ്രതിജ്ഞ ചെയ്യുന്നത്.
പട്നയിലെ രാജ്ഭവനില് വച്ചായിരുന്നു സത്യപ്രതിജ്ഞ. ഇന്നലെ രാവിലെ ജെഡി(യു) യോഗത്തിനുശേഷം മുഖ്യമന്ത്രി സ്ഥാനം രാജിവച്ച നിതീഷ് കുമാര്, വൈകിട്ട് തേജസ്വി യാദവിനൊപ്പം ഗവര്ണര് ഫാഗു ചൗഹാനെ കണ്ട് സര്ക്കാരുണ്ടാക്കാന് കത്തുനല്കുകയായിരുന്നു.
കഴിഞ്ഞ ദിവസം വരെ പ്രതിപക്ഷ നേതാവായിരുന്ന ആര്ജെഡിയുടെ തേജസ്വി യാദവ് ഉപമുഖ്യമന്ത്രിയായും സത്യപ്രതിജ്ഞ ചെയ്തു. ഗവര്ണര് ഫഗു ചൗഹാന് ഇരുവര്ക്കും സത്യവാചകം ചൊല്ലിക്കൊടുത്തു. കോണ്ഗ്രസും ഇടതുപാര്ട്ടികളും ചേര്ന്നതാണ് മഹാസഖ്യം. മുഖ്യമന്ത്രിയും ഉപമുഖ്യമന്ത്രിയും മാത്രമാണ് ഇന്ന് രാജ്ഭവനില് ചേര്ന്ന ചടങ്ങില് സത്യപ്രതിജ്ഞ ചെയ്തത്. മന്ത്രിസഭാ വിപുലീകരണം അടുത്ത ദിവസം തന്നെയുണ്ടാകും.
സത്യപ്രതിജ്ഞ ചടങ്ങിന് മുമ്പായി നിതീഷ് ആര്ജെഡി മേധാവി ലാലുപ്രസാദ് യാദവുമായി ഫോണില് സംസാരിച്ചു. പുതിയ തീരുമാനത്തിന് ലാലു നിതീഷിനെ അഭിനന്ദിച്ചു.
