കോട്ടയം: കോട്ടയം മെഡിക്കല് കോളേജ് ആശുപത്രിയില് കെട്ടിടം തകര്ന്നുവീണ് അപകടത്തില് മരിച്ച തലയോലപ്പറമ്പ് സ്വദേശിനി ബിന്ദുവിന്റെ വീട് സന്ദര്ശിച്ച് ആരോഗ്യവകുപ്പ് മന്ത്രി വീണാ ജോര്ജ്. ഇന്ന് രാവിലെ 7.10 ഓടെയാണ് ബിന്ദുവിന്റെ വീട്ടിലേയ്ക്ക് മന്ത്രി എത്തിയത്. മന്ത്രിയെത്തിയപ്പോള് വൈകാരികമായ രംഗങ്ങളായിരുന്നു വീട്ടില്. മന്ത്രിയെ കണ്ടപ്പോള് ബിന്ദുവിന്റെ അമ്മ സീതാലക്ഷ്മി മന്ത്രിയെ കെട്ടിപ്പിടിച്ച് കരഞ്ഞതോടെ മന്ത്രിയും കരഞ്ഞു.ബിന്ദുവിന്റെ അമ്മ സീതാലക്ഷ്മി കരഞ്ഞു. ഇതോടെ മന്ത്രിയും വിതുമ്പി.
മന്ത്രിയോടെ ബിന്ദുവിന്റെ അമ്മയാണ് ആദ്യം കാര്യങ്ങള് സംസാരിച്ചത്. തുടര്ന്ന് ബിന്ദുവിന്റെ ഭര്ത്താവ് വിശ്രുതനും കാര്യങ്ങള് വിശദീകരിച്ചു. സംഭവത്തില് സത്യസന്ധമായ അന്വേഷണം നടത്തണമെന്ന് വിശ്രുതന് ആവശ്യപ്പെട്ടു. കുടുംബത്തിന്റെ അത്താണിയെയാണ് നഷ്ടപ്പെട്ടതെന്ന് വിശ്രുതന് പറഞ്ഞു. മകന് അവന് പഠിച്ച കോഴ്സുമായി ബന്ധപ്പെട്ട് സ്ഥിരം ജോലി നല്കണമെന്ന് വിശ്രുതന് ആവശ്യപ്പെട്ടു. മുഖ്യമന്ത്രിയുമായി സംസാരിച്ച് ഇക്കാര്യത്തില് നടപടിയെടുക്കണം. മുഖ്യമന്ത്രി തങ്ങളോട് അനുകൂല സമീപനമാണ് സ്വീകരിക്കുന്നതെന്നും വിശ്രുതന് പറഞ്ഞു. ഇതിനിടെ വീട് നവീകരിക്കാനുള്ള എല്ലാ സഹായവും നല്കുമെന്ന് കെ അനില്കുമാര് അറിയിച്ചു.
കുടുംബത്തിന്റെ ദുഃഖം തന്റെയും ദുഃഖമാണ്. സര്ക്കാര് ബിന്ദുവിന്റെ കുടുംബത്തിനൊപ്പം പൂര്ണമായും ഉണ്ടാകും. മുഖ്യമന്ത്രി കാര്യങ്ങള് സംസാരിച്ചിരുന്നു. ഉചിതമായ തീരുമാനം ഉണ്ടാകും. മന്ത്രിസഭായോഗത്തിന് ശേഷം മുഖ്യമന്ത്രി പ്രഖ്യാപനം നടത്തുമെന്നും മന്ത്രി വീണാ ജോര്ജ് മാധ്യമങ്ങളോട് പറഞ്ഞു.
ഇക്കഴിഞ്ഞ വ്യാഴാഴ്ചയായിരുന്നു കോട്ടയം മെഡിക്കല് കോളേജ് ആശുപത്രിയില് സര്ജിക്കല് വാര്ഡിന് സമീപത്തെ ശുചിമുറിയുടെ ഭാഗം തകര്ന്നുവീണാണ് ബിന്ദു മരിച്ചത്. മകള് നവമിയുടെ ചികിത്സയുമായി ബന്ധപ്പെട്ട് ആശുപത്രിയില് എത്തിയതായിരുന്നു ബിന്ദു.
