മലപ്പുറം:ഓണാഘോഷം പരിസ്ഥിതി സൗഹൃദമാക്കുന്നതിന്റെ ഭാഗമായി ഹരിതചട്ടം കര്ശനമായി പാലിക്കണമെന്ന് ജില്ലാ കളക്ടര് വി.ആര്. പ്രേംകുമാര് അറിയിച്ചു. ‘മാലിന്യമില്ലാ ഓണം’ എന്ന സന്ദേശത്തിലാണ് ഇത്തവണത്തെ ഓണാഘോഷം. സര്ക്കാര്, അര്ധ സര്ക്കാര് സ്ഥാപനങ്ങള്, വ്യാപാര സ്ഥാപനങ്ങള്, ഓണച്ചന്തകള്, വിവിധ സംഘടനകള്, ക്ലബുകള് തുടങ്ങിയവരുടെ നേതൃത്വത്തില് നടത്തുന്ന ഓണാഘോഷ പരിപാടികളിലും മേളകളിലും ഹരിതചട്ടം പാലിക്കുന്നുണ്ടെന്ന് ഉറപ്പുവരുത്തണം.
ഇത് സംബന്ധിച്ച മാര്ഗനിര്ദേശങ്ങളും സര്ക്കാര് പുറത്തിറക്കിയിട്ടുണ്ട്. ആഘോഷ പരിപാടികളുമായി ബന്ധപ്പെട്ടുള്ള ബാനറുകള്, ഹോര്ഡിങുകള്, കമാനങ്ങള് എന്നിവ പ്രകൃതി സൗഹൃദ വസ്തുക്കള് ഉപയോഗിച്ചു മാത്രമേ നിര്മിക്കാവൂ.
ഏകോപയോഗ വസ്തുക്കളുടെ ഉപയോഗം നിയന്ത്രിക്കുക, നിരോധിത ഉത്പന്നങ്ങളുടെ ഉപയോഗം തടയുക, ആഘോഷങ്ങളുടെ ഭാഗമായുള്ള അലങ്കാരങ്ങള്ക്കും മറ്റും പ്രകൃതി സൗഹൃദ വസ്തുക്കള് പ്രയോജനപ്പെടുത്തുക, വേദികള് ശുചീകരിക്കുക, മാലിന്യം തരംതിരിച്ച് ശേഖരിച്ച് സംസ്കരിക്കുക തുടങ്ങിയവയാണ് പ്രധാന മാര്ഗ നിര്ദേശങ്ങള്. മാലിന്യം തരംതിരിച്ച് അജൈവ മാലിന്യം ഹരിത കര്മ്മ സേനയ്ക്ക് യൂസര്ഫീ നല്കി കൈമാറണം.
കേന്ദ്ര-സംസ്ഥാന സര്ക്കാരുകള് ഒറ്റത്തവണ ഉപയോഗിക്കാവുന്ന വിവിധ പ്ലാസ്റ്റിക് ഉത്പന്നങ്ങള് നിരോധിച്ചതിന്റെ അടിസ്ഥാനത്തില് അത്തരം വസ്തുക്കളുടെ ഉപയോഗം ശ്രദ്ധയില്പ്പെട്ടാല് കര്ശന നടപടികള് സ്വീകരിക്കും. പൊതുജനങ്ങള് ഓണാഘോഷ വേദികളില് നിരോധിത ഉത്പന്നങ്ങള് കൊണ്ട് വരാതിരിക്കുന്നതിനും ശ്രദ്ധിക്കണമെന്നും അഭ്യര്ഥിച്ചു. ശാസ്ത്രീയ മാലിന്യ സംസ്കരണ രീതി പാലിക്കാത്തവര്, നിരോധിത പ്ലാസ്റ്റിക് ഉത്പന്നങ്ങള് ഉപയോഗിക്കുന്നവര് തുടങ്ങിയ നിയമലംഘനം നടത്തുന്നവര്ക്കെതിരെ ശക്തമായി നിയമനടപടി സ്വീകരിക്കുന്നതിന് തദ്ദേശ സ്വയംഭരണ സ്ഥാപനതല വിജിലന്സ് സ്ക്വാഡിനും ജില്ലാ എന്ഫോഴ്സ്മെന്റ് സ്ക്വാഡിനും നിര്ദേശം നല്കിയിട്ടുണ്ട്.
മലബാറി ന്യൂസ് ഓണ്ലൈന് വാര്ത്തകള് വാട്സ്ആപ്പ് ഗ്രൂപ്പുകളിലും ലഭിക്കും. വാട്സ്ആപ്പ് ഗ്രൂപ്പില് അംഗമാവാന് ഇവിടെ ക്ലിക്ക് ചെയ്യു
