ന്യൂയോര്ക്ക്: യുഎസ്-കാനഡ അതിര്ത്തിയില് മഞ്ഞില് അകപ്പെട്ട് പിഞ്ച് കുഞ്ഞടക്കം നാല് ഇന്ത്യക്കാര് മരിച്ചു. ബുധനാഴ്ച കാനഡയിലെ എമേഴ്സണിലാണ് അപകടം. അമേരിക്കയിലേക്ക് അനധികൃതമായി കടക്കാന് ശ്രമിക്കുമ്പോഴായിരുന്നു ദുരന്തം. സംഘത്തിലെ മറ്റ് ഏഴ് പേരെ അവശനിലയില് കനേഡിയന് പൊലീസ് രക്ഷിച്ചു. ഇവരെ അമേരിക്കയിലേക്ക് കടത്താന് ശ്രമിച്ചയാളെ അറസ്റ്റ് ചെയ്തു.
മഞ്ഞില് പുതഞ്ഞ നിലയില് മാനിറ്റോബ റോയല് കനേഡിയന് മൗണ്ടഡ് പൊലീസാണ് മൃതദേഹങ്ങള് കണ്ടെടുത്തത്. അമേരിക്കന് അതിര്ത്തിയില് നിന്ന് വെറും 12 മീറ്റര് മാത്രം അകലെയായിരുന്നു മൃതദേഹങ്ങള്. മരിച്ചവരുടെ വിവരങ്ങള് അറിയാനുള്ള അന്വേഷണം ആരംഭിച്ചതായും പൊലീസ് പറഞ്ഞു.
മരിച്ചവരെ തിരിച്ചറിയാനുള്ള ശ്രമങ്ങള് നടത്തുകയാണെന്ന് മാനിറ്റോബ റോയല് കനേഡിയന് മൗണ്ടഡ് പോലീസ് അസിസിറ്റന്റ് കമ്മിഷണര് ജെയ്ന് മക്ലചി മാധ്യമങ്ങളോട് പറഞ്ഞു. ഞെട്ടിക്കുന്ന വാര്ത്തയെന്ന് വിദേശകാര്യ മന്ത്രി ഡോ. എസ് ജയ്ശങ്കര് പ്രതികരിച്ചു. അടിയന്തിര ഇടപെടല് നടത്താന് കാനഡയിലെ ഇന്ത്യന് നയതന്ത്ര കാര്യാലയത്തിന് നിര്ദേശം നല്കി. ഇന്ത്യന് സംഘം അപകട സ്ഥലത്തേയ്ക്ക് പോകുമെന്ന് കാനഡയിലെ ഇന്ത്യന് ഹൈക്കമ്മീഷണര് അജയ് ബിസാരിയ അറിയിച്ചു. രണ്ട് മുതിര്ന്നവരും ഒരു കൗമാരക്കാരനും പിഞ്ചുകുഞ്ഞുമാണ് മരിച്ചത്. ഇവര് ഒരു കുടുംബത്തിലുള്ളവരാണെന്നും പൊലീസ് അറിയിച്ചു.
