കോഴിക്കോട്: കര്ണാടകയിലെ ഷിരൂരിലെ മണ്ണിടിച്ചിലില് കാണാതായ അര്ജുന്റെ കോഴിക്കോട്ടെ വീട് സന്ദര്ശിച്ച് മുഖ്യമന്ത്രി പിണറായി വിജയന്. മുഖ്യമന്ത്രി കുടുംബാംഗങ്ങളുമായി സംസാരിച്ചു.പത്ത് മിനിറ്റോളം കുടുംബാംഗങ്ങളോട് സംസാരിച്ച് അവരെ ആശ്വസിപ്പിച്ച ശേഷമാണ് മുഖ്യമന്ത്രി മടങ്ങിയത്. അര്ജുനെ എത്രയും പെട്ടെന്ന് കണ്ടെത്തണമെന്ന ആവശ്യമുന്നയിച്ച് അര്ജുന്റെ കുടുംബം മുഖ്യമന്ത്രിയ്ക്ക് നേരിട്ട് നിവേദനം കൈമാറി. മുഖ്യമന്ത്രി എല്ലാ വിധത്തിലുള്ള സഹായവും വാഗ്ദാനം ചെയ്തെന്ന് അര്ജുന്റെ സഹോദരി മാധ്യമങ്ങളോട് പറഞ്ഞു.
അര്ജുനായുള്ള തിരച്ചില് പുനരാരംഭിക്കുമെന്ന് കര്ണ്ണാടക സര്ക്കാര് അറിയിച്ചിരുന്നുവെങ്കിലും പ്രതികൂല കാലാവസ്ഥയായതിനാല് പുഴയിലേക്ക് ഇറങ്ങാന് സാധിച്ചിട്ടില്ല.അര്ജുനെ കണ്ടെത്താനുള്ള ദൗത്യത്തില് വീണ്ടും അനിശ്ചിതത്വത്തിലാണ്. മുങ്ങല് വിദഗ്ധന് ഈശ്വര് മാല്പെയ്ക്ക് ഗംഗാവലി പുഴയിലിറങ്ങി തിരച്ചില് നടത്താന് അനുമതി ലഭിച്ചിട്ടില്ല. ഗംഗാവലി പുഴയില് വലിയ അടിയൊഴുക്ക് അനുഭവപ്പെടുന്നുണ്ടെന്ന് വിശദീകരിച്ചാണ് അനുമതി നിഷേധിച്ചിരിക്കുന്നത്.
