ന്യൂഡല്ഹി: ടിപിആര് നിരക്കനനുസരിച്ച് കോവിഡ് പരിശോധനകളുടെ എണ്ണം കൂട്ടണമെന്ന് സംസ്ഥാനങ്ങള്ക്ക് കേന്ദ്ര ആരോഗ്യ മന്ത്രാലയത്തിന്റെ നിര്ദേശം.
കോവിഡ് വ്യാപനം രൂക്ഷമായ ഡല്ഹി, മുംബൈ എന്നിവിടങ്ങളില് കഴിഞ്ഞ മൂന്ന് ദിവസമായി പ്രതിദിന രോഗികളുടെ എണ്ണത്തില് വലിയ കുറവ് രേഖപ്പെടുത്തിയിരുന്നു. എന്നാല് ടെസ്റ്റ് പോസിറ്റിവിറ്റി നിരക്കില് കാര്യമായ വ്യത്യാസം ഉണ്ടാവുന്നില്ല. ഈ പ്രദേശത്തിന്റെ ടെസ്റ്റുകളുടെ എണ്ണം കുറയുന്നു എന്നാണ് ആരോഗ്യ മന്ത്രാലയത്തിന്റെ വിലയിരുത്തല്. അതിനാലാണ് രോഗികളുടെ എണ്ണം കുറയുന്നതെന്നും കേന്ദ്ര സര്ക്കാര് വിലയിരുത്തുന്നു.
ഇതിനെ തുടര്ന്ന് എല്ലാ സംസ്ഥാനങ്ങളോടും ടെസ്റ്റുകളുടെ എണ്ണം വര്ധിപ്പിക്കാനാണ് സര്ക്കാര് നിര്ദേശം നല്കിയിരിക്കുന്നത്. ടെസ്റ്റ് പോസിറ്റിവിറ്റി നിരക്ക് കൂടുതലായ പ്രദേശങ്ങളില് പരിശോധന ശക്തമാക്കാനും സര്ക്കാര് നിര്ദേശം നല്കിയിട്ടുണ്ട്. അതുവഴി വൈറസിന്റെ വ്യാപനം പരമാവധി തടയുന്നതിനുള്ള അടിയന്തിര നടപടികള് സ്വീകരിക്കാന് സംസ്ഥാനങ്ങള് തയ്യാറാവണമെന്നും കേന്ദ്രം നിര്ദേശിക്കുന്നു.
കോവിഡ് രോഗികള്ക്ക് ചികിത്സയ്ക്ക് ശേഷവും ചുമ തുടരുകയാണെങ്കില് അവര്ക്ക് സ്റ്റിറോയിഡ് നല്കുന്നതിന് പകരം അവരെ ക്ഷയരോഗ പരിശോധനയ്ക്ക് വിധേയരാക്കണമെന്ന പുതിയ മാര്ഗരേഖയും ആരോഗ്യമന്ത്രാലയം പുറപ്പെടുവിച്ചു. നിലവിലെ സാഹചര്യം അത്ര ആശ്വാസകരമല്ലെന്നും കേന്ദ്ര സര്ക്കാരിന്റെ നിര്ദേശങ്ങളില് വ്യക്തമാക്കുന്നു.
