നടിയെ ആക്രമിച്ച കേസില് ചോദ്യം ചെയ്യലിന് ഹാജരാകാമെന്ന് ദിലീപിന്റെ സഹോദരന് അനൂപും ഭാര്യ സഹോദരന് സുരാജും. ഏത് ദിവസവും ഹാജരാകാന് തയ്യാറാണെന്ന് ഇരുവരും ക്രൈംബ്രാഞ്ചിനെ അറിയിച്ചു. സ്ഥലത്തില്ലാതിരുന്നതിനാലാണ് നോട്ടീസ് കൈപ്പറ്റാന് കഴിയാതിരുന്നതെന്നാണ് ഇരുവരുടെയും വിശദീകരണം.
അനൂപിന്റെയും സുരാജിന്റെയും ചോദ്യം ചെയ്യല് ഉടന്തന്നെ ഉണ്ടാകുമെന്നാണ് ക്രൈം ബ്രാഞ്ച് വ്യക്തമാക്കുന്നത്. നേരത്തെ നിരവധി തവണ ഇവരെ ഫോണില് വിളിച്ചിട്ട് കിട്ടിയിരുന്നില്ല. തുടര്ന്ന് നോട്ടീസ് കൊണ്ടുപോയി വീട്ടില് പതിക്കുകയായിരുന്നു. എന്നിട്ടും ഇവര് ഹാജരായിരുന്നില്ല. ക്രൈംബ്രാഞ്ച് തുടര് നടപടികളിലേക്ക കടക്കാനിരിക്കെയാണ് ഇവര് എപ്പോള് വേണമെങ്കിലും ഹാജരാകാമെന്ന് കാണിച്ച് മറുപടി കത്ത് നല്കിയത്. ഇവര്ക്ക് ഉടന് തന്നെ ക്രൈംബ്രാഞ്ച് ചോദ്യം ചെയ്യലിനുള്ള തിയ്യതി നല്കും.
അതേസമയം, നടിയെ ആക്രമിച്ച കേസില് തുടരന്വേഷണ പുരോഗതി ക്രൈംബ്രാഞ്ച് മറ്റന്നാള് കോടതിയെ അറിയിക്കും.
കാവ്യാമാധവന് ഉള്പ്പടെ ദിലീപിന്റെ ബന്ധുക്കളെ ചോദ്യം ചെയ്യാന് കഴിയാത്ത സാഹചര്യം കോടതിയെ അറിയിക്കും. അതേ സമയം ദിലീപിന്റെ ജാമ്യം റദ്ദാക്കണമെന്ന പ്രോസിക്യൂഷന് അപേക്ഷയും വിചാരണക്കോടതി മറ്റന്നാള് പരിഗണിക്കും. വീട്ടില് വെച്ച് ചോദ്യം ചെയ്യണമെന്ന നിലപാടാണ് കാവ്യ സ്വീകരിച്ചിരുന്നത്. വിശദമായ ചോദ്യം ചെയ്യലിനാണ് ക്രൈംബ്രാഞ്ച് തയ്യാറെടുക്കുന്നതെന്നാണ് വിവരം. ബാലചന്ദ്രകുമാറിനെ ഉള്പ്പടെ വിളിച്ചുവരുത്തി ഇവരെ ഒരുമിച്ച് ചോദ്യം ചെയ്യാനും സാധ്യതതയുണ്ട്. ഇതിനാലാണ് കാവ്യയെ ചോദ്യം ചെയ്യുന്നത് നീണ്ടുപോകുന്നതെന്നാണ് വിവരം.
