HIGHLIGHTS : Case against parent who escorted madrasa students with air gun
കാസര്കോട്: തെരുവുനായപ്പേടിയില് വിദ്യാര്ഥികളുടെ സംരക്ഷണത്തിനായി തോക്കെടുത്ത സംഭവത്തില് രക്ഷിതാവിനെതിരെ കേസ്. ഐപിസി 153 പ്രകാരം ലഹള ഉണ്ടാക്കാന് ഇടയാക്കുന്ന തരത്തിലുള്ള പ്രവൃത്തി നടത്തിയതിനാണ് ബേക്കല് പൊലീസ് സമീറിനെതിരെ കേസെടുത്തത്. വ്യാഴാഴ്ച രാവിലെയാണ് സമീര് എയര് ഗണ്ണുമായി കുട്ടികള്ക്ക് സംരക്ഷണമൊരുക്കി മുന്നില് നടന്നത്. സാമൂഹിക മാധ്യമങ്ങളില് ഈ വീഡിയോ വ്യാപകമായി പ്രചരിച്ചിരുന്നു. ഇതിനെ തുടര്ന്ന് ബേക്കല് പൊലീസ് സ്വമേധയാ കേസെടുക്കുകയായിരുന്നു.
എയര്ഗണ്ണുകൊണ്ട് വെടിവെച്ചാല് നായ ചാകില്ല. ആരെയും അപായപ്പെടത്താന് ശ്രമിച്ചിട്ടില്ല. ഷോ കേസില് വെച്ചിരുന്ന എയര്ഗണ്ണാണിതെന്നും ഉന്നം തെറ്റാതെ വെടിവെക്കാന് അറിയില്ലെന്നും സമീര് പറഞ്ഞു. തന്റെ കുട്ടിയെ സംരക്ഷിക്കേണ്ടത് തന്റെ കടമയാണ്. അതുമാത്രമാണ് ചെയ്തതെന്നും കാസര്കോട് ബേക്കല് ഹദ്ദാദ് നഗറിലെ സമീര് പറഞ്ഞു.
ഇയാളുടെ മകനാണ് ദൃശ്യങ്ങള് സമൂഹ മാധ്യമങ്ങളില് പങ്കുവെച്ചത്. എയര്ഗണാണ് കയ്യിലുള്ളതെന്നും നായയെ വെടിവെച്ചിട്ടില്ലെന്നുമാണ് ദൃശ്യങ്ങള് പ്രചരിക്കപ്പെട്ടതോടെ സമീര് പറഞ്ഞത്.