തിരുവനന്തപുരം: എകെജി സെന്റര് ആക്രമണക്കേസിലെ പ്രതി പിടിയില്. മണ്വിള സ്വദേശി യൂത്ത് കോണ്ഗ്രസ് പ്രവര്ത്തകനായ ജിതിനെയാണ് ക്രൈംബ്രാഞ്ച് കസ്റ്റഡിയിലെടുത്തത്. ജിതിനാണ് സ്ഫോടക വസ്തുവെറിഞ്ഞതെന്നാണ് ക്രൈംബ്രാഞ്ചിന്റെ കണ്ടെത്തല്.
കഴിഞ്ഞ ജൂലൈ 30 ന് അര്ദ്ധരാത്രിയിലാണ് എകെജി സെന്ററിന് നേരെ പടക്കമേറുണ്ടായത്. സ്കൂട്ടറില് ഒരാള് വന്ന് പടക്കമെറിയുന്ന എകെജി സെന്ററിലെ സിസിടിവി ദൃശ്യമായിരുന്നു ലഭ്യമായ ഏക തെളിവ്. സംഭവം നടന്ന് മിനുട്ടുകള്ക്കുള്ളില് പുറത്തുവന്ന ഈ സിസിടിവി ദൃശ്യത്തിനപ്പുറം ഒരുമാസം പിന്നിടുമ്പോഴും ഒന്നും കണ്ടെത്താനായില്ല. നൂറിലേറെ സിസിടിവി ദൃശ്യങ്ങള് പരിശോധിച്ചു. പ്രതി സഞ്ചരിച്ചെന്ന സംശയിക്കുന്ന മോഡല് ഡിയോ സ്കൂട്ടര് ഉടമകളെ മുഴുവന് ചോദ്യം ചെയ്തു.
ഒടുവില് എകെജി സെന്ററിന് കല്ലെറിയുമെന്ന് ദിവസങ്ങള്ക്ക് മുമ്പ് പോസ്റ്റിട്ട യുവാവിനെ കസ്റ്റഡിയിലെടുത്തു. ഇത് വിവാദമായതോടെ യുവാവിനെ വിട്ടയച്ചു.
നിയമസഭ കഴിയുന്നതുവരെ പ്രത്യേക സംഘം അന്വേഷിച്ചിരുന്ന കേസ് പിന്നീടാണ് ക്രൈംബ്രാഞ്ചിന് കൈമാറിയത്.
