യുണൈറ്റഡ് കിംങ്ഡമിലെ (യു.കെ) നാഷണല് ഹെല്ത്ത് സര്വ്വീസ് (NHS) പ്രതിനിധിസംഘം നോര്ക്ക അധികൃതരുമായി തിരുവനന്തപുരത്ത് ചര്ച്ച നടത്തി. വരുന്ന സാമ്പത്തിക വര്ഷം മുതല് പ്രതിവര്ഷം 1000 പ്ലസ് റിക്രൂട്ട്മെന്റുകള് (പ്രോജക്റ്റ് 1000പ്ലസ്) സാധ്യമാക്കാനാണ് ലക്ഷ്യമിടുന്നതെന്ന് കൂടിക്കാഴ്ചയില് നോര്ക്ക റൂട്ട്സ് സി.ഇ.ഒ കെ.ഹരികൃഷ്ണന് നമ്പൂതിരി, ജനറല് മാനേജര് അജിത്ത് കോളശ്ശേരി എന്നിവര് വ്യക്തമാക്കി. ഡോക്ടര്മാര്,നഴ്സുമാര് എന്നിവരെ കൂടാതെ ആരോഗ്യമേഖലയില് നിന്നുളള മറ്റ് പ്രൊഷണലുകള്ക്കൂടി അവസരം ലഭ്യമാക്കുന്നതാണിത്. കഴിഞ്ഞ മൂന്നു യു.കെ കരിയര് ഫെറുകള് സംബന്ധിച്ചും യോഗത്തില് വിശദമായി വിലയിരുത്തി. യു.കെ യിലേയ്ക്കുളള റിക്രൂട്ട്മെന്റ് നടപടികള് നിശ്ചിതസമയപരിധിക്കുളളില് സാധ്യമാക്കുന്നതിനായുളള നിര്ദ്ദേശങ്ങളും ചര്ച്ച ചെയ്തു. പ്രത്യേക റിക്രൂട്ട്മെന്റ് പോര്ട്ടലിന്റെയും ഡിജിറ്റല് സാധ്യതകളും ചര്ച്ച ചെയ്തു.
കെയര്ഹോമുകളിലേയ്ക്കുളള സീനിയര് സപ്പോര്ട്ട് വര്ക്കര്മാരുടെ സാധ്യതകള് കൂടുതല് സുതാര്യമാക്കുന്നതിനുളള നടപടി സ്വീകരിക്കും. കേരളത്തില് നിന്നുളള നഴ്സുമാരുടെ തൊഴില്നൈപുണ്യം മികച്ചതാണെന്ന് യു.കെ സംഘം ചൂണ്ടിക്കാട്ടി. മറ്റ് സംസ്ഥാനങ്ങളില് ജോലി ചെയ്യുന്ന കേരളത്തില് നിന്നുളള നഴ്സുമാര്ക്കുകൂടി ഉപകാരപ്രദമാകും വിധം റിക്രൂട്ട്മെന്റ് രീതിയില് മാറ്റത്തിനും നിര്ദ്ദേശമുണ്ടായി. റിക്രൂട്ട്മെന്റുകള് നടപടികള് കൂടുതല് വേഗത്തിലാക്കുന്നതിനുതകും വിധം നോര്ക്ക റൂട്ട്സ് റിക്രൂട്ട്മെന്റ് വിഭാഗം പുനക്രമീകരിക്കുമെന്നും യോഗത്തില് വ്യക്തമാക്കി. യു.കെ എന്.എച്ച്.എസ് നോര്ത്തേണ് ലിങ്കണ്ഷെയര് ആന്റ് ഗൂള് പ്രതിനിധികളായ റിക്രൂട്ട്മെന്റ് ആന്റ് വര്ക്ക്ഫോഴ്സ് വിഭാഗം മേധാവി ഡേവിഡ് സ്പാര്ക്വ (David Sprawka) ഡെപ്യൂട്ടി ഡയറക്ടര് പോള് ബുന്യാന്(Paul Bunyan), പ്രൈമര് കെയര് വര്ക്ക്ഫോഴ്സ് ഡവലപ്മെന്റ് വിഭാഗത്തില് നിന്നും കെവിന് ആന്ഡേഴ്സണ് (Kevin Anderson), ലോറ സ്റ്റാന്റ്ലാന്റ് (Laura Standland) എന്നിവരാണ് ചര്ച്ചയില് പങ്കെടുത്തത്. നോര്ക്ക റൂട്ട്സ് റിക്രൂട്ട്മെന്റ് മാനേജര് മനോജ്. ടി, ഹോം ഒതന്റിക്കേഷന് ഓഫീസര് സുഷമാഭായി.എസ്, റിക്രൂട്ട്മെന്റ് വിഭാഗത്തില് നിന്നും ഫിറോസ്ഷാ ആര്.എം, ജി.ആര് രതീഷ് എന്നിവരും മറ്റ് ജീവനക്കാരും സംബന്ധിച്ചു.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ലിങ്കില് ക്ലിക്ക് ചെയ്യു
