ദുബൈ: മൂന്ന് മാസം മുമ്പ് ദുബൈയില് കാണാതായ മലയാളി യുവാവിനെ മരിച്ച നിലയില് കണ്ടെത്തി. കോഴിക്കോട് വടകര കൊയിലാണ്ടി സ്വദേശി അമല് സതീഷിനെയാണ് മരിച്ച നിലയില് കണ്ടെത്തിയത്. ദുബായ് റാഷിദിയയിലെ ആളൊഴിഞ്ഞ വില്ലയിൽ തൂങ്ങിമരിച്ച നിലയിൽ പോലീസ് കണ്ടെത്തുകയായിരുന്നു. 29 വയസുകാരനായിരുന്ന അമലിനെ കഴിഞ്ഞ വര്ഷം ഒക്ടോബര് 20നാണ് കാണാതായത്.
ദുബൈയിലെ അല് വര്സാനില് നിന്ന് കാണാതായ അമലിനെ കണ്ടെത്താനായി വ്യാപകമായ അന്വേഷണങ്ങള് നടന്നിരുന്നു. വര്സാനിലെ ഇലക്ട്രിക്കല് കമ്പനിയില് സെയില്സ് വിഭാഗത്തില് ജോലി ചെയ്തിരുന്ന അമല്, ഒക്ടോബര് 20ന് വൈകുന്നേരം 4.30ഓടെയാണ് ജോലി സ്ഥലത്തുനിന്ന് പുറത്തിറങ്ങിയത്. പിന്നീട് തിരികെയെത്തിയില്ല. പിതാവ് ഉള്പ്പെടെ യുഎഇയില് എത്തി തെരച്ചില് നടത്തിയെങ്കിലും ഫലമുണ്ടായില്ല. ദുബൈ പൊലീസില് പരാതി നല്കിയത് പ്രകാരം പൊലീസും അന്വേഷണം നടത്തിയിരുന്നു.
യുഎഇയുടെ വിവിധ ഭാഗങ്ങളില് സുഹൃത്തുക്കളും ബന്ധുക്കളും അന്വേഷിച്ചെങ്കിലും ഫലമുണ്ടായില്ല. തുടര്ന്ന് അമലിനെ കണ്ടെത്താന് പൊതുജനങ്ങളുടെ സഹായവും സുഹൃത്തുക്കള് തേടി. മാധ്യമങ്ങളിലും വാര്ത്തകള് വന്നിരുന്നു. പിതാവ് ഏതാനും ദിവസം മുമ്പാണ് നാട്ടിലേക്ക് മടങ്ങിയത്.
നടപടികള് പൂര്ത്തിയാക്കി മൃതദേഹം നാട്ടിലെത്തിച്ച് സംസ്കരിക്കുമെന്ന് സാമൂഹിക പ്രവര്ത്തകര് അറിയിച്ചു.
മലബാറി ന്യൂസ് ഓണ്ലൈന് വാര്ത്തകള് വാട്സ്ആപ്പ് ഗ്രൂപ്പുകളിലും ലഭിക്കും. വാട്സ്ആപ്പ് ഗ്രൂപ്പില് അംഗമാവാന് ഇവിടെ ക്ലിക്ക് ചെയ്യു
