ഖത്തറില്‍ ഗതാഗത വിവരങ്ങള്‍ നല്‍കാന്‍ പുതിയ ആപ്

ദോഹ: യാത്രക്കാര്‍ക്ക് പുതിയ വിവരങ്ങള്‍ നല്‍കുന്നതിനും ഗതാഗതക്കുരുക്കുകള്‍ സംബന്ധിച്ച അറിയിപ്പുകള്‍ നല്‍കുന്നതിനും വേണ്ടി പൊതുമരാമത്ത് വിഭാഗവും (അഷ്ഗാല്‍)ഖത്തര്‍ മൊബിലിറ്റി ഇന്നൊവേഷന്‍ സെന്ററും (ക്യു എം ഐ സി) തമ്മില്‍ ധാരണാപത്രം ഒപ്പിട്ടു.

ഇതുപ്രകാരം വേഇന്‍ എന്ന ആപ്പിലൂടെ വിവരങ്ങള്‍ ലഭ്യമാകും. അഷ്ഗാലിനുവേണ്ടി പ്രസിഡന്റ് ഡോ.സാദി ബിന്‍ അഹമ്മദ് അല്‍ മുഹന്നദിയും ക്യു എം ഐ സിക്കുവേണ്ടി എക്‌സിക്യൂട്ടീവ് ഡയറക്ടര്‍ ഡോ. അദാനാന്‍ അബു ദയ്യുയുമാണ് ധാരണാപത്രത്തില്‍ ഒപ്പു വെച്ചത്. ഖത്തറില്‍ ഇപ്പോള്‍ ഒട്ടേറെ പുതിയ റോഡു നിര്‍മാണ പ്രവൃത്തികള്‍ പൂര്‍ത്തിയാക്കി തുറന്നുകൊടുക്കുന്നതിനാലും വികസനത്തിന്റെ ഭാഗമായി പല റോഡുകളിലും ഗതാഗതം നിരോധിക്കുന്നതിനാലും വേഇന്‍ ഡ്രൈവര്‍മാര്‍ക്ക് ഏറെ സഹായകരമാകും.

ഇതിനു പുറമെ പല സ്ഥലങ്ങളിലേക്കും എത്താനുള്ള എളുപ്പവഴികള്‍, പൊതുപരിപാടികളുടെ വേദികളിലെ്ത്താനുള്ള വഴികള്‍, മേല്‍വിലാസത്തിന്റെ അടിസ്ഥാനത്തില്‍ വീടുകളിലും ഓഫീസുകളിലും എത്താനുള്ള വഴികള്‍ എന്നിവയ്ക്ക് പുറമെ സൈക്കള്‍ ട്രാക്കിലെ വിവരങ്ങളും വേഇന്‍ വഴി ലഭിക്കും.