HIGHLIGHTS : താരസംഘടനായ അമ്മയിലേക്ക് നടന് ദിലീപിനെ തിരിച്ചെടുത്ത നടപടിയെ ശക്തമായ ഭാഷയില് വിമര്ശിച്ച് സിനിമയിലെ വനിതാ സംഘടനയായ വുമണ് ഇന് സിനിമ കളടീവ് രംഗത്ത...
താരസംഘടനായ അമ്മയിലേക്ക് നടന് ദിലീപിനെ തിരിച്ചെടുത്ത നടപടിയെ ശക്തമായ ഭാഷയില് വിമര്ശിച്ച് സിനിമയിലെ വനിതാ സംഘടനയായ വുമണ് ഇന് സിനിമ കളടീവ് രംഗത്ത്. തങ്ങളുടെ ഫേസ്ബുക്ക് പേജില് പോസ്റ്റ് ചെയ്ത കുറിപ്പിലൂടെയാണ് തങ്ങള് അമ്മയോടെ ചോദിക്കാന് ആഗ്രഹിക്കുന്ന ചോദ്യങ്ങള് എന്ന പേരില് തീരുമാനത്തെ എതിര്ത്തിരിക്കുന്നത്.
ഡബ്ല്യുസിസിയുടെ ഫേസ് ബുക്ക് പോസ്റ്റിന്റെ പൂര്ണ രൂപം
ദിലീപിനെ സംഘടനയിലേക്ക് തിരിച്ചെടുക്കാൻ അമ്മയുടെ ജനറൽ ബോഡി തീരുമാനിച്ചതായി വാർത്താ മാധ്യമങ്ങളിൽ നിന്ന് അറിഞ്ഞു. അത് ശരിയാണെങ്കിൽ
വിമെൻ ഇൻ സിനിമാ കളക്ടീവ് ചില കാര്യങ്ങൾ ചോദിക്കാൻ ആഗ്രഹിക്കുന്നു.
1,അമ്മ സംഘടന എന്തിനായിരുന്നു ദിലീപ് എന്ന നടനെ പുറത്താക്കിയത്?
2. സംഘടനയിലേക്ക് ഇപ്പോൾ തിരിച്ചെടുക്കുവാൻ തീരുമാനിക്കുമ്പോൾ നേരത്തേ ഉണ്ടായിരുന്നതിൽ നിന്ന് വ്യത്യസ്തമായി എന്തു പുതിയ സാഹചര്യമാണ് ഉണ്ടായിട്ടുള്ളത്?
3. ബലാൽസംഗം പോലുള്ള ഒരു കുറ്റകൃത്യത്തിൽ ആരോപിതനായ വ്യക്തിയെ ആണ് വിചാരണ പോലും പൂർത്തിയാവുന്നതിനു മുമ്പ് നിങ്ങൾ തിരിച്ചെടുക്കുന്നത്. അതിൽ നിങ്ങൾക്ക് യാതൊരു അപാകതയും തോന്നുന്നില്ലെ?
4. അതിക്രമത്തെ അതിജീവിച്ച ആളും ഈ സംഘടനയുടെ തന്നെ അംഗമല്ലെ ?
5. ഇപ്പോൾ എടുത്ത ഈ തീരുമാനം വഴി അതിക്രമത്തെ അതിജീവിച്ചവളെ വീണ്ടും അപമാനിക്കുകയല്ലെ നിങ്ങൾ ചെയ്യുന്നത്?
6. ഒരു ജനാധിപത്യ സംഘടന എന്ന നിലയിൽ ഇപ്പോൾ എടുത്ത തീരുമാനം എന്തു തരത്തിലുള്ള സന്ദേശമാണ് കേരള സമൂഹത്തിനു നൽകുക?
7. വിചാരണാ ഘട്ടത്തിലുള്ള ഒരു കേസിൽ ഉൾപ്പെട്ട വ്യക്തിയെ സംബന്ധിച്ചുള്ള ഇത്തരം തീരുമാനങ്ങൾ ഈ നാട്ടിലെ നിയമ നീതിന്യായ സംവിധാനങ്ങളോടുള്ള വെല്ലുവിളിയല്ലെ?
നിങ്ങളുടെ തികച്ചും സ്ത്രീവിരുദ്ധമായ തീരുമാനത്തെ ഞങ്ങൾ അപലപിക്കുന്നു. WCCഅവൾക്കൊപ്പം.