പുലിപ്പല്ല് കേസില് ജാമ്യം നേടിയതിന് പിന്നാലെ പ്രതികരണവുമായി റാപ്പര് വേടന്. സമൂഹത്തില് ഇരട്ട നീതി എന്നത് തര്ക്കമില്ലെന്ന് വേടന്. കേസ് വേദനിപ്പിച്ചോ എന്ന ചോദ്യത്തിന്, നിങ്ങളെ വേദനിപ്പിച്ചെങ്കില് എന്നെയും വേദനിപ്പിച്ചെന്നായിരുന്നു വേടന്റെ മറുപടി. വിവേചനമുള്ള സമൂഹമാണ് നമ്മുടേതെന്നും എല്ലാവരും ഒരുപോലെയല്ലെന്നും വേടന് പ്രതികരിച്ചു.
ഇനിയും മൂര്ച്ചയുള്ള പാട്ടുകള് എഴുതുമെന്നും തെറ്റ് തിരുത്താന് ശ്രമിക്കുമെന്നും വേടന് വ്യക്തമാക്കി. ‘ഞാനൊരു കലാകരന് ആണ്, ഞാന് എന്റെ കല ചെയ്യുന്നു. അത് നിങ്ങള് കേള്ക്കുന്നു. അത്രതന്നെ. പാട്ടെഴുതുകയെന്നതാണ് എന്റെ ജോലി. വേടന് പൊതുസ്വത്താണ്. ഒരു കലാകാരന് പൊതുസ്വത്താണ്. ഒരു കലാകാരന് രാഷ്ട്രീയത്തെപ്പറ്റിയും ചുറ്റും നടക്കുന്നതിനെ കുറിച്ചു പ്രതികരിക്കേണ്ടയാളാണ്’ വേടന് പറഞ്ഞു.
പുലിപ്പല്ല് കേസില് റാപ്പര് വേടനെതിരെ പ്രഥമദൃഷ്ട്യാ കുറ്റകൃത്യമില്ലെന്ന് ചൂണ്ടിക്കാട്ടി കോടതി ജാമ്യം നല്കിയിരുന്നു. നിലവിലെ തെളിവുകള് അനുസരിച്ച് പ്രഥമദൃഷ്ട്യാ കുറ്റകൃത്യം തെളിയിക്കാനായില്ല. റാപ്പര് വേടന്റെ മാലയിലെ പുലിപ്പല്ല് യഥാര്ത്ഥമാണോയെന്ന് ഇതുവരെ കണ്ടെത്താനായിട്ടില്ല. പുലിപ്പല്ല് യഥാര്ത്ഥമാണോ എന്ന് കണ്ടെത്തേണ്ടത് ശാസ്ത്രീയ പരിശോധനയിലെന്ന് കോടതി പറഞ്ഞു.
അതെസമയം വേടന് എതിരായ പുലിപ്പല്ല് കേസില് കൂടുതല് അന്വേഷണം ആരംഭിച്ചിരിക്കുകയാണ് വനം വകുപ്പ്. പിടിച്ചെടുത്ത പുലിപ്പല്ല് ശാസ്ത്രീയ പരിശോധനയ്ക്ക് അയച്ചിരിക്കുകയാണ്.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ഈ
ലിങ്കില് ക്ലിക്ക് ചെയ്യു
