തിരുവനന്തപുരം: ശബരിമല സ്വര്ണക്കൊള്ള കേസില് ദേവസ്വം ബോര്ഡ് മുന് പ്രസിഡന്റ് എ പത്മകുമാര് അറസ്റ്റില്. തിരുവനന്തപുരത്ത് ക്രൈംബ്രാഞ്ച് ആസ്ഥാനത്ത് വെച്ച് നടന്ന ചോദ്യം ചെയ്യലിന് ഒടുവിലാണ് അറസ്റ്റ്. എഡിജിപി എച്ച് വെങ്കിടേഷിന്റെ നേതൃത്വത്തിലാണ് പത്മകുമാറിനെ ചോദ്യംചെയ്തത്. കേസിലെ മറ്റൊരു പ്രതിയായ മുന് ദേവസ്വം ബോര്ഡ് അധ്യക്ഷന് എന് വാസുവിനെ കസ്റ്റഡിയില് വാങ്ങിയിട്ടുണ്ട്. ഇരുവരെയും ഒരുമിച്ചിരുത്തിയായിരുന്നു ചോദ്യം ചെയ്യല്.
ശബരിമലയിലെ ദ്വാരപാലക ശില്പ്പത്തിലെ സ്വര്ണവും കട്ടിളപ്പാളികളും അറ്റകുറ്റപ്പണിക്കായി 2019ല് അഴിച്ച് കൊണ്ടുപോകുമ്പോള് ദേവസ്വം ബോര്ഡ് പ്രസിഡന്റായിരുന്നത് എ പത്മകുമാര് ആയിരുന്നു.
ഉണ്ണികൃഷ്ണന് പോറ്റി, ദേവസ്വം ബോര്ഡ് മുന് അഡ്മിനിസ്ട്രേറ്റീവ് ഓഫിസര് മുരാരി ബാബു, മുന് എക്സിക്യുട്ടീവ് ഓഫിസര് ഡി സുധീഷ്കുമാര്, മുന് ദേവസ്വം കമ്മിഷണറും അധ്യക്ഷനുമായിരുന്ന എന് വാസു എന്നിവരാണ് ശബരിമല സ്വര്ണക്കൊള്ള കേസില് ഇതുവരെ അറസ്റ്റിലായവര്.
