തിരുവനന്തപുരം: സംസ്ഥാനത്തെ പിഎസ്സി പരീക്ഷകൾക്ക് അപേക്ഷിക്കാനുള്ള ഉദ്യോഗാർത്ഥികളുടെ പ്രായപരിധി വർധിപ്പിക്കാൻ മന്ത്രിസഭാ യോഗം തീരുമാനിച്ചു. ജനറൽ വിഭാഗത്തിന്റെ പ്രായപരിധി നിലവിലുള്ള 36 വയസ്സിൽ നിന്നും 40 വയസ്സായാണ് ഉയർത്തിയത്. ജസ്റ്റിസ് ജെ. ബി. കോശി കമ്മീഷൻ സമർപ്പിച്ച ശുപാർശകൾ പരിഗണിച്ചാണ് ഈ മാറ്റം.
പുതിയ തീരുമാനപ്രകാരം സംവരണ വിഭാഗങ്ങൾക്കും പ്രായപരിധിയിൽ ആനുപാതികമായ വർധനവ് ലഭിക്കും. ഒബിസി വിഭാഗത്തിന് ഇനി 43 വയസ്സുവരെയും പട്ടികജാതി-പട്ടികവർഗ വിഭാഗങ്ങൾക്ക് 45 വയസ്സുവരെയും പരീക്ഷകൾക്ക് അപേക്ഷിക്കാനാകും. നിലവിൽ ഇത് യഥാക്രമം 39, 41 എന്നിങ്ങനെയായിരുന്നു.
പ്രായപരിധി ഉയർത്തണമെന്ന ഉദ്യോഗാർത്ഥികളുടെ ദീർഘകാലത്തെ ആവശ്യം പരിഗണിച്ചാണ് നടപടി. വിവിധ കാരണങ്ങളാൽ പരീക്ഷകൾ എഴുതാൻ സാധിക്കാതെ പ്രായപരിധി പിന്നിട്ടവർക്ക് പുതിയ തീരുമാനം പ്രകാരം അപേക്ഷിക്കാൻ സാധിക്കും. നിയമസഭാ തിരഞ്ഞെടുപ്പിന് മുന്നോടിയായുള്ള നിർണ്ണായക തീരുമാനങ്ങളിലൊന്നായാണ് രാഷ്ട്രീയ വൃത്തങ്ങൾ ഇതിനെ കാണുന്നത്.
ഇതുസംബന്ധിച്ച ഔദ്യോഗിക വിജ്ഞാപനം ഉടൻ പുറത്തിറങ്ങും. പുതിയ ഉത്തരവ് നിലവിൽ വരുന്നതോടെ പിഎസ്സി പുറപ്പെടുവിക്കുന്ന പുതിയ വിജ്ഞാപനങ്ങളിൽ ഈ ഇളവ് ബാധകമാകും.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ഈ ലിങ്കില് ക്ലിക്ക് ചെയ്യു
