ദില്ലി: ഇന്ത്യക്കെതിരെ രാത്രിയിലും ആക്രമണം തുടര്ന്ന് പാകിസ്ഥാന്. ജമ്മുവില് പാക്കിസ്ഥാന് ഡ്രോണ് ആക്രമണം നടത്തി. ജമ്മു വിമാനത്താവളത്തിനോട് ചേര്ന്നാണ് ആക്രമണം നടന്നത്. ജമ്മു നഗരത്തിലടക്കം സൈന്യം ഡ്രോണുകള് വെടിവച്ചിട്ടതായാണ് വിവരം. അന്പതോളം ഡ്രോണുകള് വെടിവച്ചിട്ടെന്ന് ദൃക്സാക്ഷികള് പറയുന്നു. പലയിടത്തും സൈറണ് മുഴങ്ങിയിട്ടുണ്ട്. അതേസമയം, സൈന്യം ശക്തമായി തിരിച്ചടിച്ചുയെന്നും റിപ്പോര്ട്ടുണ്ട്.
വിമാനത്താവളം ലക്ഷ്യമിട്ടുള്ള ആക്രമണം ഇന്ത്യ വ്യോമ പ്രതിരോധ സംവിധാനം ഉപയോഗിച്ച് തകര്ക്കുകയായിരുന്നു. സംഭവത്തിന്റെ പശ്ചാത്തലത്തില് ജമ്മുവില് ഇന്റര്നെറ്റ് റദ്ദാക്കി. ജമ്മു വിമാനത്താവളം, പത്താന് കോട്ട്, അഖ് നൂര്, സാംബ എന്നിവിടങ്ങളാണ് ഭീകരര് ലക്ഷ്യമിട്ടത്. ജമ്മു മേഖലയില് നിലവില് പാക്കിസ്ഥാന്റെ കനത്ത വെടിവെപ്പ് തുടരുകയാണ്. പഞ്ചാബ് അതിര്ത്തിയിലും കുപ്വാരയിലും കനത്ത വെടിവെപ്പ് ആണ് നടക്കുന്നത്. പഞ്ചാബില് കനത്ത ജാഗ്രത തുടരുകയാണ്. പഞ്ചാബ് അതിര്ത്തിയില് ലൈറ്റണച്ച് കരുതല് നടപടി തുടങ്ങി. സൈനിക കേന്ദ്രങ്ങളും ലക്ഷ്യം വച്ചായിരുന്നു ആക്രമണം എന്നാണ് പുറത്തുവരുന്നത്.
എല്ലാ ലൈറ്റുകളും അണയ്ക്കാന് ജനങ്ങള്ക്ക് നിര്ദേശം നല്കി. വാഹനങ്ങളടക്കം പാര്ക്ക് ചെയ്ത് ലൈറ്റുകള് ഓഫാക്കണം, പരിഭ്രാന്തരാകരുതെന്നും, മുന്കരുതലെടുക്കാനും നിര്ദേശം നല്കിയിട്ടുണ്ട്.
ഓപ്പറേഷന് സിന്ദൂരിന് പിന്നാലെ ഇന്ത്യയെ ആക്രമിക്കാനുള്ള പാകിസ്ഥാന്റെ ശ്രമങ്ങളെ പരാജയപ്പെടുത്തിയെന്നും തക്കതായ മറുപടി നല്കിയെന്നും സൈനിക ഉദ്യോഗസ്ഥരും വിദേശകാര്യമന്ത്രാല സെക്രട്ടറിയും ചേര്ന്ന് നടത്തിയ സംയുക്ത വാര്ത്താസമ്മേളനത്തില് പറഞ്ഞു. ഇന്ത്യയുടെ സൈനിക കേന്ദ്രങ്ങളും നഗരങ്ങളും ലക്ഷ്യമിട്ടായിരുന്നു ആക്രമണം. ഇതിന് മറുപടിയായി ലഹോറിലെ വ്യോമ പ്രതിരോധ സംവിധാനം തകര്ത്തുവെന്നും ഉന്നത സൈനിക ഉദ്യോഗസ്ഥരായ വിങ് കമാന്ഡര് വ്യോമിക സിങും കേണല് സോഫിയ ഖുറേഷിയും വിദേശകാര്യ സെക്രട്ടറി വിക്രം മിസ്രിയും വാര്ത്താസമ്മേളനത്തില് വ്യക്തമാക്കി.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ഈ
ലിങ്കില് ക്ലിക്ക് ചെയ്യു
