നിപ എന്തുകൊണ്ടു വീണ്ടും കോഴിക്കോട് എന്നതുമായി ബന്ധപ്പെട്ട് ഐ.സി.എം.ആര്. വ്യക്തമായ ഉത്തരം നല്കിയിട്ടില്ലെന്നും, ഇതുമായി ബന്ധപ്പെട്ടു സംസ്ഥാനം സീറോ സര്വലന്സ് പഠനം നടത്താന് തീരുമാനിച്ചിട്ടുണ്ടെന്നും മുഖ്യമന്ത്രി പിണറായി വിജയന്. ഇക്കാര്യത്തില് വിശദമായ പ്രൊപ്പോസല് തയാറാക്കാന് ആരോഗ്യ വകുപ്പിനോട് ആവശ്യപ്പെട്ടിട്ടുണ്ടെന്നും മുഖ്യമന്ത്രി പറഞ്ഞു.
വവ്വാലുകളെ സംബന്ധിച്ച് ഐ.സി.എം.ആര് നടത്തിയ പഠനത്തിന്റെ വിവരങ്ങളും നമുക്ക് ലഭ്യമാകും. വവ്വാലിനെ പിടിക്കാതെ തന്നെ സാമ്പിള് ശേഖരിച്ചുള്ള ഗവേഷണം തോന്നക്കല് വൈറളോജി ഇന്സ്റ്റിട്ട്യൂട്ടിന്റെ സഹായത്തോടെ നടപ്പാക്കും. 2018ല് കോഴിക്കോടും 2019ല് എറണാകുളത്തും 2021ല് വീണ്ടും കോഴിക്കോടും നിപ രോഗബാധ ഉണ്ടായിട്ടുണ്ട്. സംസ്ഥാനത്തു നിപ രോഗനിര്ണയത്തിനായി ലാബുകള് സജ്ജമാണ്. തോന്നക്കലിലെ ഇന്സ്റ്റിറ്റൂട്ട് ഓഫ് വൈറോളജിയില് നിപ വൈറസ് രോഗം നിര്ണ്ണയിക്കാന് സാമ്പിള് പരിശോധനാ സംവിധാനമുണ്ട്. 2021 സെപ്റ്റംബര് മുതല് കോഴിക്കോട് മെഡിക്കല് കോളേജിലെ പ്രത്യേകം സജ്ജീകരിച്ച ലാബില് നിപ രോഗ നിര്ണയ പരിശോധന നടന്നുവരുന്നുണ്ട്. ഇതു രണ്ടും സംസ്ഥാന സര്ക്കാരിന്റെ ഉടമസ്ഥതയിലും നിയന്ത്രണത്തിലുമുള്ളതാണ്. 2018ല് സംസ്ഥാനത്ത് നിപ രോഗബാധ സംബന്ധിച്ച പ്രോട്ടോകോള് പുറത്തിറക്കിയിരുന്നു. 2021 സെപ്റ്റംബറില് ഇത് പരിഷ്കരിച്ചു. നിപ ചികില്സ, മരുന്നുകള്, ഐസൊലേഷന്, സാമ്പിള് പരിശോധന തുടങ്ങിയ കാര്യങ്ങള് നടപ്പിലാക്കുന്നത് ഈ പ്രോട്ടോകോള് പ്രകാരമാണ്. പുതിയ ശാസ്ത്രീയ നിഗമനങ്ങളുടെ അടിസ്ഥാനത്തില് 2023ല് ചെറിയ ചില മാറ്റങ്ങളോടെ 2021ലെ പ്രോട്ടോകോളും ആരോഗ്യവിദഗ്ധ സമിതി പരിഷ്കരിച്ചിട്ടുണ്ട്.
2022ല് ആരോഗ്യം, വനം, മൃഗസംരക്ഷണം തുടങ്ങിയ വകുപ്പുകളെ ഏകോപിപ്പിച്ച് നടത്തിയ വര്ക്ക്ഷോപ്പില് സുപ്രധാനങ്ങളായ പരിപാടികള് ആവിഷ്കരിച്ചിരുന്നു. വിദഗ്ധര് പങ്കെടുത്ത ഈ വര്ക്ക്ഷോപ്പിന്റെ അടിസ്ഥാനത്തില് നിപ പ്രതിരോധത്തിനായി കലണ്ടര് തയാറാക്കി കര്മ്മപരിപാടി നടപ്പാക്കുകയാണ്. നിപ ഔട്ട്ബ്രേക്ക് നിരീക്ഷിക്കാന് സി.ഡി.എം.എസ് പോര്ട്ടല് ഇ-ഹെല്ത്ത് രൂപീകരിച്ചു. വവ്വാലുകളില് നിന്ന് വൈറസ് ബാധ ഉണ്ടാകാതിരിക്കാനുളള സാമൂഹിക ബോധവല്ക്കരണ പരിപാടികള് നടത്തുന്നുണ്ട്.
ജനങ്ങളെ ബോധവല്ക്കരിക്കുന്നതിനും ആരോഗ്യ പ്രവര്ത്തകര്ക്ക് സഹായം നല്കുന്നതിനും മാധ്യമങ്ങള് കാണിക്കുന്ന ജാഗ്രതയെ പ്രത്യേകം അഭിനന്ദിക്കുന്നു. എന്നാല് ചില തെറ്റായ പ്രവണതകളും ഉണ്ടായിട്ടുണ്ട്. തെറ്റിദ്ധരിപ്പിക്കുന്നതും ഭീതി പടര്ത്തുന്നതുമായ വാര്ത്തകള് നല്കാതിരിക്കാനുള്ള ജാഗ്രത തുടര്ന്നും കാണിക്കണം. അതീവ ഗുരുതര പ്രഹരശേഷിയുള്ള വൈറസാണിത്. ഫീല്ഡില് ചെന്ന് റിപ്പോര്ട്ട് ചെയ്യുമ്പോള് രോഗബാധയേല്ക്കാതിരിക്കാനുള്ള ജാഗ്രത ആരോഗ്യ പ്രവര്ത്തകര്ക്കൊപ്പം മാധ്യമ പ്രവര്ത്തകരിലും ഉണ്ടാകണം.
രണ്ടാം തരംഗത്തിനുള്ള സാധ്യത വളരെ കുറവാണെങ്കിലും പുര്ണ്ണമായും തള്ളിക്കളയാനാവില്ല എന്നാണ് നിപ അവലോകന യോഗത്തില് ആരോഗ്യ വിദഗ്ധര് അഭിപ്രായപ്പെട്ടത്. ആദ്യ ഘട്ടത്തില് നിപ കണ്ടെത്തിയ വടകര താലൂക്കിലെ കണ്ടൈന്മെന്റ് സോണിലെ കടകള് തുറക്കുന്നത് വൈകീട്ട് അഞ്ച് മണി എന്നത് എട്ട് വരെയാക്കിയിട്ടുണ്ട്. കൂടുതല് ഇളവുകള് നല്കുന്ന കാര്യം 22നു ശേഷം തീരുമാനിക്കുമെന്നും മുഖ്യമന്ത്രി പറഞ്ഞു.
മലബാറി ന്യൂസ് ഓണ്ലൈന് വാര്ത്തകള് വാട്സ്ആപ്പ് ഗ്രൂപ്പുകളിലും ലഭിക്കും. വാട്സ്ആപ്പ് ഗ്രൂപ്പില് അംഗമാവാന് ഇവിടെ ക്ലിക്ക് ചെയ്യു
