നവകേരളത്തിന്റെ ഭാവി വികസന സാധ്യതകളും കൈവരിച്ച നേട്ടങ്ങളും പൊതുജനങ്ങള്ക്കു മുന്നില് അവതരിപ്പിക്കുന്നതിനും ജനങ്ങളുമായി സംവദിക്കുന്നതിനുമായി സംസ്ഥാന സര്ക്കാര് സംഘടിപ്പിക്കുന്ന നവകേരള സദസിന് ഇന്ന് കാസര്കോട് മഞ്ചേശ്വരം മണ്ഡലത്തിലെ പൈവളിഗെയില് തുടക്കമാവും. വൈകിട്ട് 3.30ന് നടക്കുന്ന ചടങ്ങില് മുഖ്യമന്ത്രി പിണറായി വിജയന് നവകേരള സദസ് ഉദ്ഘാടനം ചെയ്യും. റവന്യു മന്ത്രി കെ. രാജന് അധ്യക്ഷത വഹിക്കും. ഡിസംബര് 23ന് വൈകിട്ട് ആറിന് തിരുവനന്തപുരം വട്ടിയൂര്ക്കാവിലാണ് സമാപനം.
മുഖ്യമന്ത്രിയും മന്ത്രിമാരും കേരളത്തിലെ 140 മണ്ഡലങ്ങളിലും നവകേരള സദസിന്റെ ഭാഗമായി പര്യടനം നടത്തും. സ്വാതന്ത്ര്യസമര സേനാനികള്, വെറ്ററന്സ്, വിവിധ മേഖലകളിലെ പ്രമുഖര്, തെരഞ്ഞെടുക്കപ്പെട്ട മഹിളാ, യുവജന, കോളേജ് യൂണിയന് ഭാരവാഹികള്, പട്ടികജാതി പട്ടികവര്ഗ വിഭാഗങ്ങളിലെ പ്രതിഭകള്, കലാകാരന്മാര്, സെലിബ്രിറ്റികള്, അവാര്ഡ് ജേതാക്കള്, തെയ്യം കലാകാരന്മാര്, സാമുദായിക സംഘടനാ നേതാക്കള്, മുതിര്ന്ന പൗരന്മാരുടെ പ്രതിനിധികള്, വിവിധ സംഘടനാ പ്രതിനിധികള്, ആരാധനാലയങ്ങളുടെ പ്രതിനിധികള് തുടങ്ങിയവര് മണ്ഡലം സദസിലെ പ്രത്യേക ക്ഷണിതാക്കളാകും.
മന്ത്രിസഭായോഗം നടക്കുന്നതൊഴികെയുള്ള ദിവസങ്ങളില് രാവിലെ 9 മണിക്ക് ഓരോ മണ്ഡലത്തിലെയും പ്രത്യേക ക്ഷണിതാക്കളുമായി കൂടിക്കാഴ്ച നടക്കും. തുടര്ന്ന് വിവിധ മണ്ഡലങ്ങളിലെ സദസുകളിലേക്ക് മുഖ്യമന്ത്രിയും മന്ത്രിമാരും യാത്രതിരിക്കും. ജനങ്ങളില് നിന്ന് പരാതികള് സ്വീകരിക്കുന്നതിന് ഓരോ വേദിയിലും സംവിധാനമുണ്ടാവും.
നവകേരള സദസ് ആരംഭിക്കുന്നതിന് മൂന്നു മണിക്കൂര് മുമ്പ് മുതല് പരാതികള് സ്വീകരിച്ചു തുടങ്ങും. മുഴുവന് പരാതികളും സ്വീകരിക്കുന്നതു വരെ കൗണ്ടറുകള് പ്രവര്ത്തിക്കും. പരാതികള് സമര്പ്പിക്കുന്നത് സംബന്ധിച്ച മാര്ഗനിര്ദ്ദേശങ്ങള് കൗണ്ടറുകളില് പ്രദര്ശിപ്പിക്കും. മുതിര്ന്ന പൗരന്മാര്, ഭിന്നശേഷിക്കാര്, സ്ത്രീകള് എന്നിവര്ക്ക് പ്രത്യേകം കൗണ്ടറുകള് ഒരുക്കും. ലഭിക്കുന്ന പരാതികള് വേഗത്തില് തീര്പ്പാക്കാനുള്ള സംവിധാനമാണ് നിശ്ചയിച്ചിട്ടുള്ളത്. എല്ലാ പരാതികള്ക്കും കൈപ്പറ്റ് രസീത് നല്കും. പരാതി തീര്പ്പാകുന്ന മുറയ്ക്ക് തപാലില് അറിയിക്കുകയും ചെയ്യും. പരാതികളുടെ സ്ഥിതി www.navakeralasadas.kerala.gov.inല് നിന്ന് അറിയാനാകും. രസീത് നമ്പരോ പരാതിയിലുള്ള മൊബൈല് നമ്പറോ നല്കിയാല് മതി.
പരാതികളില് രണ്ടാഴ്ചയ്ക്കുള്ളിലും കൂടുതല് നടപടിക്രമം ആവശ്യമെങ്കില് പരമാവധി നാലാഴ്ചയ്ക്കുള്ളിലും ജില്ലാതല ഉദ്യോഗസ്ഥര് തീരുമാനം എടുക്കും. സംസ്ഥാനതലത്തില് തീരുമാനമെടുക്കേണ്ട വിഷയങ്ങളില് ജില്ലാ ഓഫീസര്മാര് വകുപ്പ്തല മേധാവി മുഖേന റിപ്പോര്ട്ട് സമര്പ്പിക്കും. ഇത്തരം പരാതികള് 45 ദിവസത്തിനകം തീര്പ്പാക്കും. അപേക്ഷകന് ഇടക്കാല മറുപടിയും നല്കും.
ഓരോ നിയമസഭാ മണ്ഡലത്തിലും എ. എല്. എമാരുടെയും സര്ക്കാര് ഉദ്യോഗസ്ഥരുടെയും നേതൃത്വത്തിലുള്ള സംഘാടക സമിതികള് പ്രവര്ത്തിക്കുന്നുണ്ട്. ഇതോടൊപ്പം തദ്ദേശസ്ഥാപന പ്രതിനിധികള്ക്കും ചുമതല നല്കിയിട്ടുണ്ട്.
മന്ത്രിമാരായ അഹമ്മദ് ദേവര്കോവില്, റോഷി അഗസ്റ്റിന്, എ.കെ.ശശീന്ദ്രന്,
കെ.കൃഷ്ണന് കുട്ടി, അഡ്വ.ആന്റണി രാജു എന്നിവര് ആശംസ നേരും.
മന്ത്രിമാരായ കെ. രാധാകൃഷ്ണന്, കെ.എന്.ബാലഗോപാല്, പി.രാജീവ്, ജെ.ചിഞ്ചുറാണി, വി.എന്.വാസവന്, സജി ചെറിയാന്, പി.എ.മുഹമ്മദ് റിയാസ്, പി. പ്രസാദ്, വി.ശിവന്കുട്ടി, എം.ബി.രാജേഷ്, അഡ്വ.ജി.ആര്.അനില്, ഡോ.ആര്.ബിന്ദു, വീണ ജോര്ജ്, വി. അബ്ദുറഹ്മാന് ജില്ലാ പഞ്ചായത്ത് പ്രസിഡണ്ട് പി.ബേബി ബാലകൃഷ്ണന് എന്നിവരുടെ സാന്നിധ്യത്തിലാണ് സദസ്സ് ഉദ്ഘാടനം ചെയ്യുന്നത്. ചീഫ് സെക്രട്ടറി ഡോ.വി.വേണു സ്വാഗതവും ജില്ലാ കളക്ടര് കെ. ഇമ്പശേഖര് നന്ദിയും പറയും.
മലബാറി ന്യൂസ് ഓണ്ലൈന് വാര്ത്തകള് വാട്സ്ആപ്പ് ഗ്രൂപ്പുകളിലും ലഭിക്കും. വാട്സ്ആപ്പ് ഗ്രൂപ്പില് അംഗമാവാന് ഇവിടെ ക്ലിക്ക് ചെയ്യു
