HIGHLIGHTS : Malayali student commits suicide in Punjab; protest
പഞ്ചാബ് ജലന്ധറില് മലയാളി വിദ്യാര്ത്ഥി ആത്മഹത്യ ചെയ്തു. ജലന്ധറിലെ ലവ്ലി പ്രൊഫഷണല് സര്വ്വകലാശാലയിലെ ഒന്നാം വര്ഷ വിദ്യാര്ത്ഥി അഖിന് എസ്. ദിലീപി(21)നെയാണ് ഹോസ്റ്റല് മുറിയില് മരിച്ചനിലയില് കണ്ടെത്തിയത്. ചൊവ്വാഴ്ച വൈകിട്ടാണ് മലയാളി വിദ്യാര്ഥി
ആത്മഹത്യ ചെയ്തത്. ഒരുമാസം മുമ്പാണ് വിദ്യാര്ഥി ബി.ഡിസൈന് കോഴ്സിന് ചേര്ന്നത്.
പത്തുദിവസത്തിനിടെ കാമ്പസില് രണ്ടുവിദ്യാര്ഥികളാണ് ജീവനൊടുക്കിയതെന്നും സംഭവത്തില് അന്വേഷണം വേണമെന്നും ആവശ്യപ്പെട്ടാണ് വിദ്യാര്ഥികള് പ്രതിഷേധിച്ചത്. ആദ്യത്തെ സംഭവം സര്വകലാശാല അധികൃതര് മൂടിവെച്ചതായും രണ്ട് ആത്മഹത്യകള്ക്ക് പിന്നിലെയും യഥാര്ഥ കാരണം അറിയണമെന്നും വിദ്യാര്ഥികള് ആവശ്യപ്പെട്ടു.
എന്നാല് വ്യക്തിപരമായ കാരണങ്ങളാലാണ് അത്മഹത്യയെന്നാണ് സര്വ്വകലാശാല പറയുന്നത്. ആത്മഹത്യാ കുറിപ്പ് കണ്ടെത്തിയിട്ടുണ്ട്. അന്വേഷണത്തോട് പൂര്ണമായും സഹകരിക്കുമെന്നും സര്വകലാശാല വ്യക്തമാക്കി.