HIGHLIGHTS : Kalamandal removed the governor from the post of chancellor; Department of Culture issued an order
തിരുവനന്തപുരം: കേരള ഗവര്ണര് ആരിഫ് മുഹമ്മദ് ഖാനെ സംസ്ഥാനത്തെ കല്പ്പിത സര്വകലാശാല കേരള കലാമണ്ഡലത്തിന്റെ ചാന്സലര് സ്ഥാനത്ത് നിന്ന് നീക്കി. സാംസ്കാരിക വകുപ്പിന് കീഴിലാണ് കലാമണ്ഡലം പ്രവര്ത്തിക്കുന്നത്. ചാന്സലര് സ്ഥാനത്ത് നിന്ന് നീക്കിക്കൊണ്ട് സാംസ്കാരിക വകുപ്പ് ഉത്തരവ് പുറപ്പെടുവിച്ചു. സംസ്ഥാനത്തെ സര്വകലാശാലകളുടെ ചാന്സലര് സ്ഥാനത്ത് നിന്ന് ഗവര്ണറെ നീക്കുന്നതിന്റെ ആദ്യ പടിയായാണ് ഗവര്ണറെ കേരള കലാമണ്ഡലത്തിന്റെ ചാന്സലര് പദവിയില് നിന്ന് നീക്കിയത്.
പുതിയ ചാന്സലര് ചുമതലയേറ്റെടുക്കും വരെ പ്രോ ചാന്സലര് ചാന്സലറുടെ ചുമതല വഹിക്കും. സംസ്ഥാന സാംസ്കാരിക വകുപ്പ് മന്ത്രി വിഎന് വാസവനാണ് നിലവില് കലാമണ്ഡലം കല്പിത സര്വകലാശാലയുടെ പ്രോ വൈസ് ചാന്സലര്. ചട്ട പ്രകാരം സ്പോണ്സറാണ് ചാന്സലറെ നിയമിക്കേണ്ടത്.
കലാ സാംസ്കാരിക രംഗത്ത പ്രമുഖന് ചാന്സിലറാകുമെന്നാണ് വിവരം. 75 വയസാണ് പരമാവധി പ്രായമായി നിശ്ചയിച്ചിരിക്കുന്നത്. 2006 മുതല് സംസ്ഥാന ഗവര്ണറാണ് കലാമണ്ഡലത്തിന്റെ ചാന്സലര്. ഈ ഉത്തരവിലൂടെ ഇടത് സര്ക്കാര് സംസ്ഥാനത്തെ ചാന്സലര് സ്ഥാനത്ത് നിന്ന് ഗവര്ണറെ മാറ്റാനുള്ള നടപടികളുമായി മുന്നോട്ട് തന്നെയെന്ന് വ്യക്തമാക്കുകയാണ്.
ഓര്ഡിനന്സിന് കഴിഞ്ഞ മന്ത്രിസഭാ യോഗം അംഗീകാരം നല്കിയിരുന്നു. ഇതിന്റെ തുടര്ച്ചയാണ് ഇപ്പോഴത്തെ നടപടി. അഞ്ച് വര്ഷത്തേക്കാവും കലാമണ്ഡലത്തിന്റെ ചാന്സലര് പദവിയിലേക്ക് നിയമനം നടത്തുകയെന്നും ഉത്തരവില് വ്യക്തമാക്കുന്നു.