മലപ്പുറം ജില്ലയില് ഓണവിപണിയിലെ വിലക്കയറ്റം പിടിച്ചുനിര്ത്തുന്നതിന് ഫലപ്രദമായ നടപടികള് സ്വീകരിക്കാന് എ.ഡി.എം കെ.മണികണ്ഠന്റെ അധ്യക്ഷതയില് ചേര്ന്ന യോഗം തീരുമാനിച്ചു. അവശ്യസാധനങ്ങളുടെ ലഭ്യത ഉറപ്പുവരുത്തുന്നതിനും വിലനിയന്ത്രിക്കുന്നതിനും വ്യാപാരികളുടെ യോഗം വിളിച്ചുചേര്ക്കും. ഹോര്ട്ടികോര്പ്പും കൃഷിവകുപ്പും ചേര്ന്ന് ജില്ലയില് പഴം, പച്ചക്കറിച്ചന്തകള് നടത്തും. കരിഞ്ചന്ത, പൂഴ്ത്തിവെയ്പ്പ് എന്നിവ തടയുന്നതിന് നടപടികള് സ്വീകരിക്കും.
കടകളില് വിലവിവരപ്പട്ടിക പ്രദര്ശിപ്പിച്ചിട്ടുണ്ടോ എന്നതും പരിശോധിക്കും. ഇതിനായി റവന്യൂ, ലീഗല് മെട്രോളജി, ഭക്ഷ്യസുരക്ഷ, പൊലീസ് ഉദ്യോഗസ്ഥരടങ്ങുന്ന സ്ക്വാഡ് രൂപീകരിച്ച് കടകളില് പരിശോധന തുടങ്ങിയിട്ടുണ്ട്. കളക്ടറേറ്റില് ചേര്ന്ന യോഗത്തില് ജില്ലാ സപ്ലൈ ഓഫീസര് സി.എ വിനോദ് കുമാര്, കൃഷി വകുപ്പ് ടെക്നിക്കല് അസി. ടി.എ അനൂപ് കുമാര് തുടങ്ങിയവര് പങ്കെടുത്തു.
