HIGHLIGHTS : In-flight protest; Protesters stormed CM; Report by Indigo Airlines
യൂത്ത് കോണ്ഗ്രസ് പ്രവര്ത്തകര് വിമാനത്തിനുള്ളില് പ്രതിഷേധിച്ചത് മുഖ്യമന്ത്രി വിമാനത്തില് ഉള്ളപ്പോഴെന്ന് ഇന്ഡിഗോ എയര്ലൈന്സ് വ്യക്തമാക്കി. വിമാനം ലാന്ഡ് ചെയ്ത ഉടനെ തന്നെ രണ്ട് പേര് പ്രതിഷേധവുമായി പാഞ്ഞടുത്തുവെന്നും അതിനിടയില് ഒരാള് തടഞ്ഞുവെന്നും പറയുന്നു.
അതേസമയം മുഖ്യമന്ത്രിക്കെതിരെ വിമാനത്തില് പ്രതിഷേധിച്ച സംഭവത്തില് പ്രതികള് ഇന്ന് കോടതിയില് ജാമ്യാപേക്ഷ നല്കും. തിരുവനന്തപുരം ജില്ലാ കോടതിയിലാകും ജാമ്യാപേക്ഷ നല്കുക. കേസ് തിരുവനന്തപുരം പ്രിന്സിപ്പല് സെഷന്സ് കോടതിയിലേക്ക് മാറ്റുകയും ചെയ്തു. കോടതി മാറ്റണമെന്ന പ്രോസിക്യൂഷന്റെ ആവശ്യം പരിഗണിച്ചാണ് ഇത്. കേസ് ജില്ലാക്കോടതിയിലേക്ക് മാറ്റിയതിനാല് മജിസ്ട്രേറ്റ് കോടതിയിലെ ജാമ്യപേക്ഷ തള്ളിയിരുന്നു. കോടതി മാറ്റരുതെന്ന പ്രതിഭാഗം വാദം തള്ളിയാണ് മജിസ്ട്രേറ്റ് കോടതി തീരുമാനമെടുത്തത്.
ഇന്ഡിഗോ വിമാനക്കമ്പനിയില് നിന്ന് വിമാനത്തിലെ മുഴുവന് യാത്രക്കാരുടെ വിവരങ്ങളും ഉദ്യോഗസ്ഥര് ശേഖരിച്ചു. കേസിലെ ഗൂഡാലോചന ഉള്പെടെ പുറത്ത് കൊണ്ടുവരുന്ന രീതിയിലുള്ള അന്വേഷണം വേണമെന്നാണ് ക്രൈംബ്രാഞ്ച് എസ്പി പ്രജീഷ് തോട്ടത്തിലിന് ഡിജിപി നല്കിയ നിര്ദ്ദേശം.
അറസ്റ്റിലായ ഫര്സീന് മജീദ്, നവീന് കുമാര് എന്നിവരെ കസ്റ്റഡിയില് വേണമെന്ന അപേക്ഷയും അന്വേഷണസംഘം കോടതിയില് സമര്പ്പിക്കും. അതേസമയം, കേസില് സഹയാത്രികരുടെ മൊഴി ഇന്നലെ എടുത്തിരുന്നു. ശംഖുമുഖം അസിസ്റ്റന്റ് കമ്മീഷണറാണ് യാത്രക്കാരുടെ മൊഴിയെടുത്തത്.