HIGHLIGHTS : Heavy rain: CM calls meeting of District Collectors; The disaster management authority has opened a special control room
ദുരിതാശ്വാസ പ്രവര്ത്തനങ്ങള് ഏകോപിപ്പിക്കാനും മഴക്കെടുതികള് വിലയിരുത്താനും ഇന്ന് വൈകിട്ട് നാലുമണിക്ക് മുഖ്യമന്ത്രി പിണറായി വിജയന് ജില്ലാ കലക്ടര്മാരുടെ യോഗം വിളിച്ചു. ദുരന്ത നിവാരണ അതോറിറ്റിയുടെ ഓഫിസ് സന്ദര്ശിച്ച് മുഖ്യമന്ത്രി സ്ഥിഗതികള് മനസ്സിലാക്കി. ചീഫ് സെക്രട്ടറിയുള്പ്പെടെയുള്ള ഉന്നത ഉദ്യോഗസ്ഥര് സന്നിഹിതരായിരുന്നു.
സംസ്ഥാനത്ത് മഴ ശക്തമാവുകയാണ്. ഏഴു ജില്ലകളില് ഇന്ന് റെഡ് അലര്ട് പ്രഖ്യാപിച്ചിട്ടുണ്ട്. തിരുവനന്തപുരം, കൊല്ലം, ഇടുക്കി, പത്തനംതിട്ട, കോട്ടയം, ആലപ്പുഴ, എറണാകുളം ജില്ലകളില് ആണ് റെഡ് അലര്ട്ട്. തൃശൂര്, മലപ്പുറം ജില്ലകളില് ഓറഞ്ച് അലര്ട്ടും ബാക്കിയുള്ള ജില്ലകളില് യെല്ലോ അലര്ട്ടുമാണ്.
അടുത്ത അഞ്ചുദിവസം ശക്തമായ മഴയ്ക്കുള്ള സാധ്യതയാണ് കേന്ദ്ര കാലാവസ്ഥാ വകുപ്പ് കാണുന്നത്. ജനങ്ങള് അതീവ ജാഗ്രത പുലര്ത്തണം. പോലീസ്, അഗ്നിരക്ഷാസേന, മറ്റ് സര്ക്കാര് സംവിധാനങ്ങള് എന്നിവരോട് ജാഗരൂഗരായിരിക്കാന് നിര്ദ്ദേശം നല്കിയിട്ടുണ്ട്.
മത്സ്യത്തൊഴിലാളികള് യാതൊരു കാരണവശാലും കടലില് പോകരുത്. ഉരുള്പൊട്ടല്, മണ്ണിടിച്ചില് സാധ്യതയുള്ള പ്രദേശങ്ങളില് നിന്ന് ആളുകളെ മാറ്റിപ്പാര്പ്പിക്കാന് നിര്ദേശം നല്കിയിട്ടുണ്ട്. ആവശ്യമെങ്കില് ക്യാമ്പുകളിലേക്ക് മാറ്റണം. ക്യാമ്പുകളില് സൗകര്യങ്ങള് ഉറപ്പാക്കണം.
നദികള്, ജലാശയങ്ങള്, തോടുകള് തുടങ്ങിയ സ്ഥലങ്ങളില് കുളിക്കാനോ അലക്കാനോ മൃഗങ്ങളെ കുളിപ്പിക്കാനോ ഇറങ്ങരുത്. രാത്രി യാത്രകള് പരമാവധി ഒഴിവാക്കണം. ദുരന്ത നിവാരണ അതോറിറ്റി അതത് സമയങ്ങളില് നല്കുന്ന മുന്നറിയിപ്പുകള് കൃത്യമായി പാലിക്കാന് എല്ലാവരും തയ്യാറാകണമെന്ന് മുഖ്യമന്ത്രി അഭ്യര്ഥിച്ചു.
സംസ്ഥാനത്തു മഴ ശക്തമായി പെയ്യുന്ന സാഹചര്യത്തില് സംസ്ഥാന ദുരന്തനിവാരണ അതോറിറ്റി പ്രത്യേക കണ്ട്രോള് റൂം തുറന്നു. ഏഴു വകുപ്പുകളിലെ ഉദ്യോഗസ്ഥര് ഈ എമര്ജന്സി ഓപ്പറേഷന് സെന്ററില് ഏകോപിച്ച് പ്രവര്ത്തിക്കും. ഇറിഗേഷന്, കെഎസ്ഇബി,മോട്ടോര് വെഹിക്കിള്, ഫയര് ആന്ഡ് റെസ്ക്യൂ പോലീസ്, ഐ – പി ആര് ഡി ,ഫിഷറീസ് വകുപ്പുകള്ക്ക് പുറമെ സിവില് ഡിഫന്സ് സേനയും എമര്ജന്സി സെന്ററിന്റെ ഭാഗമായിരിക്കും.
നിലവിലുള്ള എന്ഡിആര്എഫിനെ കൂടാതെ എറണാകുളം കോട്ടയം കൊല്ലം മലപ്പുറം ജില്ലകളിലേക്ക് പ്രത്യേക ടീമുകളെ നിയോഗിക്കും. ചെന്നൈയിലെ ആര്ക്കോണത്തുള്ള എന്ഡിആര്എഫ് മേഖല ആസ്ഥാനത്ത് നിന്നായിരിക്കും ടീമുകളെ അയക്കുക. ജില്ലാതല എമര്ജന്സി കേന്ദ്രങ്ങളും ജാഗ്രത പുലര്ത്തുന്നുണ്ട്.
സംസ്ഥാനത്ത് വ്യാപകമായ കാലവര്ഷക്കെടുതി ഉണ്ടായ സാഹചര്യത്തില് റവന്യൂ വകുപ്പ് മന്ത്രിയുടെ ഓഫീസിലും കണ്ട്രോള് സെല് പ്രവര്ത്തനം ആരംഭിച്ചൂ. നമ്പര്: 8078548538