HIGHLIGHTS : Father in hospital; Smriti Mandhana postpones wedding, deletes all posts
മുംബൈ: വിവാഹത്തിന് തൊട്ടു മുമ്പ് ആരോഗ്യപ്രശ്നങ്ങളെത്തുടര്ന്ന് പിതാവ് ശ്രീനിവാസിനെയും ഭാവി വരനും സംഗീത സംവിധായകനുമായ പലാഷ് മുച്ചലിനെയും ആശുപത്രിയില് പ്രവേശിപ്പിച്ചതിന് പിന്നാലെ വിവാഹവുമായി ബന്ധപ്പെട്ട് സമൂഹമാധ്യമങ്ങളില് പോസ്റ്റ് ചെയ്ത എല്ലാ പോസ്റ്റുകളും നീക്കം ചെയ്ത് ഇന്ത്യൻ വനിതാ ക്രിക്കറ്റ് താരം സ്മൃതി മന്ദാന. വിവാഹവുമായും വിവാഹ നിശ്ചയവുമായി ബന്ധപ്പെട്ട പോസ്റ്റുകളാണ് സമൂഹമാധ്യമങ്ങളില് നിന്ന് സ്മൃതി നീക്കം ചെയ്തത്.
പലാഷ് മുച്ചല് മുംബൈ ഡിവൈ പാട്ടീല് സ്റ്റേഡിയത്തിന് നടുവില് നിന്ന് പ്രപ്പോസ് ചെയ്യുന്ന വീഡിയോയും സ്മൃതി നീക്കം ചെയ്തിട്ടുണ്ട്. സ്മൃതിക്ക് പുറമെ ഇന്ത്യൻ ടീമിലെ അടുത്ത സുഹൃത്തുക്കളായ ജെമീമ റോഡ്രിഗസും ശ്രേയങ്ക പാട്ടീലും സ്മൃതിയുടെ വിവാഹവുമായി ബന്ധപ്പെട്ട പോസ്റ്റുകളെല്ലാം സമൂഹമാധ്യമങ്ങളില് നിന്ന് നീക്കിയിട്ടുണ്ട്. അതേസമയം, പലാഷ് മുച്ചലിന്റെ സമൂഹമാധ്യമങ്ങളില് ഇവയെല്ലാം ഇപ്പോഴും ലഭ്യമാണ്. വനിതാ ഏകദിന ലോകകപ്പില് കിരീടം നേടിയശേഷം വിവാഹത്തിന്റെ ഒരുക്കങ്ങളിലേക്ക് കടന്ന സ്മൃതിയുടെ സോഷ്യല് മീഡിയ പോസ്റ്റുകളും വീഡിയോകളും ആരാധകര് ഏറ്റെടുത്തിരുന്നു.
ഇന്നലെയായിരുന്നു സ്മൃതിയും സംഗീത സംവിധായകന് പലാഷ് മുച്ചലുമായുള്ള വിവാഹം മഹാരാഷ്ട്രയിലെ സാംഗ്ലിയില് നടക്കേണ്ടിയിരുന്നത്. എന്നാല് വിവാഹദിനം സ്മൃതിയുടെ അച്ഛന് ശ്രീനിവാസിനെ ഹൃദായാഘാതത്തെ തുടര്ന്ന് ആശുപത്രിയില് പ്രവേശിപ്പിച്ചതോടെ വിവാഹം മാറ്റിവെച്ചിരുന്നു. പ്രഭാത ഭക്ഷണം കഴിക്കുന്നതിനിടെയാണ് അദ്ദേഹത്തിന് അസ്വസ്ഥത അനുഭവപ്പെട്ടത്. ശ്രീനിവാസിന് ആന്ജിയോപ്ലാസ്റ്റി വേണ്ടിവരുമെന്നാണ് ഡോക്ടര്മാര് നിര്ദേശിച്ചിരിക്കുന്നത്. ഇതിന് പിന്നാലെ പലാഷ് മുച്ചലിനെയും അസുഖ ബാധിതനായി ആശുപത്രിയില് പ്രവേശിപ്പിച്ചിരുന്നു. വൈറല് അണുബാധയും ദഹനപ്രശ്നങ്ങളെയും തുടര്ന്നാണ് മുച്ചലിനെ ആശുപത്രിയില് പ്രവേശിപ്പിച്ചത്. മുച്ചല് പിന്നീട് ആശുപത്രി വിട്ടിരുന്നു.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ഈ ലിങ്കില് ക്ലിക്ക് ചെയ്യു
