മലപ്പുറം മുന് എസ്.പി എസ്. സുജിത് ദാസ് പീഡിപ്പിച്ചെന്ന ഗുരുതര വെളിപ്പെടുത്തലുമായി വീട്ടമ്മ. സ്വത്ത് തര്ക്കവുമായി ബന്ധപ്പെട്ട പരാതി നല്കാനെത്തിയ തന്നെ മലപ്പുറം മുന് എസ്.പി സുജിത് ദാസ്, പൊന്നാനി മുന് സി.ഐ വിനോദ് എന്നിവര് പീഡിപ്പിച്ചെന്നും തിരൂര് മുന് ഡിവൈ.എസ്.പി വി.വി. ബെന്നി ഉപദ്രവിച്ചെന്നുമാണ് യുവതിയുടെ പരാതി. പൊന്നാനി എസ് എച്ച് ഒ ആയിരുന്ന വിനോദും സുജിത് ദാസും പലസമയങ്ങളില് പീഡിപ്പിച്ചുവെന്ന് യുവതി വിവിധ മാധ്യമങ്ങളില് വെളിപ്പെടുത്തി.
2022ലാണ് പീഡനം നടന്നതെന്ന് പരാതിയില് പറയുന്നു. ആദ്യം പരാതി നല്കിയ പൊന്നാനി സി.ഐ വിനോദാണ് ആദ്യം വീട്ടിലെത്തി ബലാത്സംഗം ചെയ്തത്. ഈ പരാതി ഡി.വൈ.എസ്.പി ബെന്നിക്ക് കൈമാറിയെന്നും എന്നാല്, ബെന്നിയും വീട്ടിലെത്തി ഉപദ്രവിച്ചതായും ഇവര് പറയുന്നു. പരിഹാരം ഇല്ലാത്തതിനാല് മലപ്പുറം എസ്പിയെ കണ്ടുവെന്നും എന്നാല് സുജിത് ദാസും തന്നെ ബലാത്സംഗം ചെയ്യുകയായിരുന്നുവെന്നും യുവതി പറഞ്ഞു.
അതേസമയം, സംഭവത്തെ കുറിച്ച് നേരത്തെ പരാതി വന്നപ്പോള് അന്വേഷിച്ചിരുന്നെന്നും കഴമ്പില്ലെന്ന് കണ്ട് തള്ളിയതാണെന്നും പൊലീസ് വൃത്തങ്ങള് പറയുന്നു.
എന്നാല് തന്റെ പരാതിയില് ഒരു നടപടിയും ഉണ്ടായില്ലെന്നും വീട്ടമ്മ ആരോപിക്കുന്നു.
അതെസമയം ആരോപണം അടിസ്ഥാന രഹിതമാണെന്ന് ഡിവൈഎസ്പി വി വി ബെന്നിയും സസ്പെന്ഷനിലുള്ള എസ് പി സുജിത് ദാസും പ്രതികരിച്ചു. ആരോപണത്തില് ഗൂഡാലോചനയുണ്ടെന്നും സിബിഐ അന്വേഷണം വേണമെന്നും എസ് സുജിത് ദാസ് പ്രതികരിച്ചു. യാതൊരു അടിസ്ഥാവുമില്ലാത്ത പരാതിയാണെന്ന് വി വി ബെന്നിയും പ്രതികരിച്ചു.
