ദില്ലി: വനിതാ ഗുസ്തി താരങ്ങളുടെ പരാതിയില് മുന് ദേശീയ ഗുസ്തി ഫെഡറേഷന് അധ്യക്ഷനായ ബ്രിജ്ഭൂഷണ് സിംഗിനെതിരെ കുറ്റം ചുമത്തി ദില്ലി റൌസ് അവന്യൂ കോടതി. സ്ത്രീകള്ക്കെതിരായ ലൈംഗിക അതിക്രമം, കുറ്റകരമായ ഭീഷണിപ്പെടുത്തല് അടക്കമുള്ള വകുപ്പുകള് ചുമത്തി. ബ്രിജ്ഭൂഷണോടൊപ്പം മുന് ദേശീയ ഗുസ്തി ഫെഡറേഷന് സെക്രട്ടറി വിനോദ് തോമറിനെതിരെയും കോടതി കുറ്റം ചുമത്തിയിട്ടുണ്ട്. ഭീഷണിപ്പെടുത്തല് അടക്കമുള്ള വകുപ്പുകളാണ് തോമറിന് എതിരെ ചുമത്തിയിരിക്കുന്നത്. ആറ് വനിത ഗുസ്തി താരങ്ങളാണ് ബ്രിജ്ഭൂഷണെതിരെ കോടതിയെ സമീപിച്ചത്.
കുറ്റാരോപിതനായ ബ്രിജ് ഭൂഷണ് ശരണ് സിങ്ങിനെതിരെ ഐപിസി സെക്ഷന് 354, 354 എ (ലൈംഗിക പീഡനം) എന്നിവ പ്രകാരം ശിക്ഷാര്ഹമായ കുറ്റങ്ങള് ചുമത്താന് മതിയായ രേഖകളുണ്ടെന്ന് കോടതി വ്യക്തമാക്കി. രണ്ട് ഗുസ്തിക്കാരുടെ പരാതിയില് ഐപിസി സെക്ഷന് 506(1) പ്രകാരം ശിക്ഷാര്ഹമായ കുറ്റം ചുമത്താനുംം സിംഗിനെതിരെ മതിയായ രേഖകള് ജഡ്ജി പ്രിയങ്ക രാജ്പൂത് ഉത്തരവില് വ്യക്തമാക്കി.
ആറ് ഗുസ്തി താരങ്ങളാണ് ബ്രിജ്ഭൂഷനെതിരെ ലൈംഗികാരോപണം ഉന്നയിച്ചത്. ഇവരുടെ പരാതിയുടെ അടിസ്ഥാനത്തില് എംപിക്കെതിരെ പൊലീസ് പ്രഥമ വിവര റിപ്പോര്ട്ട് (എഫ്ഐആര്) രജിസ്റ്റര് ചെയ്തിരുന്നു. വിവിധ വകുപ്പുകള് ചേര്ത്ത് പൊലീസ് കുറ്റപത്രം സമര്പ്പിക്കുകയും ചെയ്തു.
നേരത്തെ ബ്രിജ്ഭൂഷനെതിരെ എഫ്ഐആര് രജിസ്റ്റര് ചെയ്യണമെന്നാവശ്യപ്പെട്ട് ഗുസ്തി സുപ്രീംകോടതിയെ സമീപിച്ചിരുന്നു. തുടര്ന്ന്, എഫ്ഐആര് രജിസ്റ്റര് ചെയ്തിട്ടുണ്ടെന്നും അന്വേഷണം പുരോഗമിക്കുകയാണെന്നും ഡല്ഹി പോലീസ് സുപ്രീം കോടതിയെ അറിയിച്ചു.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ലിങ്കില് ക്ലിക്ക് ചെയ്യു
