കൊച്ചി : നടി ആക്രമിക്കപ്പെട്ട കേസിലെ അന്വേഷണ ഉദ്യോഗസ്ഥര്ക്കെതിരായ വധ ഗൂഢാലോചന കേസില് ദിലീപ് അടക്കമുള്ള പ്രതികളെ വീണ്ടും ചോദ്യം ചെയ്യും. ദിലീപ്, സഹോദരന് അനൂപ്, സഹോദരീഭര്ത്താവ് സൂരജ് എന്നിവരെയാണ് ക്രൈംബ്രാഞ്ച് സംഘം വീണ്ടും ചോദ്യംചെയ്യുക.
മൊബൈല് ഫോണുകളുടെ ശാസ്ത്രീയ പരിശോധന നിലവില് പുരോഗമിച്ചുകൊണ്ടിരിക്കുകയാണ്. ഏതാനും ദിവസങ്ങള്ക്കകം ഇതിന്റെ റിപ്പോര്ട്ട് ആലുവ മജിസ്ട്രേറ്റ് കോടതിയില് ലഭിക്കും. പ്രതികളുടെ മൊബൈല് ഫോണുകളുടെ ശാസ്ത്രീയ പരിശോധന റിപ്പോര്ട്ട് ലഭിച്ചതിന് ശേഷമാകും ചോദ്യംചെയ്യല്.
ദിലീപിന്റെ സഹോദരന് അനൂപിനോട് തിങ്കളാഴ്ച ഹാജരാകാന് നിര്ദ്ദേശം നല്കി. ഇന്നലെ ഹാജരാകണമെന്ന് അനൂപിനോട് ക്രൈംബ്രാഞ്ച് അന്വേഷണ സംഘം ആവശ്യപ്പെട്ടെങ്കിലും ഹാജരായിരുന്നില്ല. നോട്ടീസും കൈപ്പറ്റിയില്ല. ഇതോടെ ഇവരുടെ വീട്ടിലെത്തിയ ക്രൈംബ്രാഞ്ച് സംഘം നോട്ടീസ് പതിച്ചു.
ദിലീപിന്റെ സഹോദരി ഭര്ത്താവ് സുരജിനേയും ദിലീപിനെയും അടുത്ത ദിവസം വിളിക്കും. ഈ പ്രതികളുടെ ഫോണ് പരിശോധന ഫലം നാളെ വരും. കേസില് ഇത് നിര്ണായകമാകുമെന്നാണ് അന്വേഷണ സംഘത്തിന്റെ വിലയിരുത്തല്.
