കൊച്ചി: മുന് മുഖ്യമന്ത്രി ഉമ്മന് ചാണ്ടിക്കെതിരെ ഫെയ്സ്ബുക്ക് ലൈവിലൂടെ അധിക്ഷേപകരമായ പരാമര്ശങ്ങള് നടത്തിയ നടന് വിനായകന്റെ വീടിനു നേരെ ആക്രമണം. കലൂര് സ്റ്റേഡിയത്തിനു പിന്നിലെ സ്റ്റേഡിയം ലിങ്ക് റോഡിലെ ഫ്ലാറ്റിലെത്തിയ ഒരു കൂട്ടം കോണ്ഗ്രസ് പ്രവര്ത്തകരാണ് ആക്രമണം നടത്തിയതെന്നാണ് വിവരം. വൈകിട്ട് നാലു മണിയോടെയായിരുന്നു ആക്രമണം. പ്രവര്ത്തകന് വിനായകന്റെ ഫ്ലാറ്റിന്റെ ചില്ല് അടിച്ചു തകര്ക്കുകയും വാതില് തകര്ക്കാന് ശ്രമിക്കുകയും ചെയ്തു.
അന്തരിച്ച് മുന് മുഖ്യമന്ത്രിക്ക് അനുകൂലമായി മുദ്രാവാക്യം വിളിച്ചുകൊണ്ട് ഫ്ലാറ്റിലെത്തിയായിരുന്നു ആക്രമണം. പൊലീസും ഫ്ലാറ്റിലെ സുരക്ഷാ ജീവനക്കാരും ചേര്ന്നാണ് പ്രവര്ത്തകരെ പിടിച്ചുമാറ്റിയത്.
അതേസമയം, ഉമ്മന് ചാണ്ടിക്കെതിരെ നടത്തിയ വിവാദ പരാമര്ശങ്ങളുമായി ബന്ധപ്പെട്ട് വിനായകനെതിരെ കേസ് റജിസ്റ്റര് ചെയ്തു. എറണാകുളം ഡിസിസി ഉള്പ്പെടെ നല്കിയ പരാതികളുടെ അടിസ്ഥാനത്തിലാണ് കേസ് റജിസ്റ്റര് ചെയ്തത്.
ഇന്നലെ വൈകിട്ട് ഫെയ്സ്ബുക് ലൈവിലെത്തിയാണ് വിനായകന് ഉമ്മന് ചാണ്ടിക്കെതിരെ അധിക്ഷേപ പരാമര്ശങ്ങള് നടത്തിയത്. ആരാണ് ഈ ഉമ്മന് ചാണ്ടി, എന്തിനാണ് മൂന്നു ദിവസം അവധി തുടങ്ങിയ ആരോപണങ്ങളാണ് ഫെയ്സ്ബുക് ലൈവിലെത്തി വിനായകന് പറഞ്ഞത്. വിനായകന്റെ ലൈവിനു പിന്നാലെ വ്യാപക പ്രതിഷേധം ഉയര്ന്നിരുന്നു.
മലബാറി ന്യൂസ് ഓണ്ലൈന് വാര്ത്തകള് വാട്സ്ആപ്പ് ഗ്രൂപ്പുകളിലും ലഭിക്കും. വാട്സ്ആപ്പ് ഗ്രൂപ്പില് അംഗമാവാന് ഇവിടെ ക്ലിക്ക് ചെയ്യു
