തിരുവനന്തപുരം: സിഎംആര്എല് എക്സാലോജിക് കേസില് മുഖ്യമന്ത്രി പിണറായി വിജയന്റെ മകള് വീണാ വിജയന്റെ മൊഴി എസ്എഫ്ഐഒ രേഖപ്പെടുത്തി. ചെന്നൈയിലെ ഓഫീസില് എത്തിയാണ് വീണ വിജയന് മൊഴി നല്കിയത്.കഴിഞ്ഞ ബുധനാഴ്ച്ചയാണ് മൊഴിയെടുത്തത്. അന്വേഷണ ഉദ്യോഗസ്ഥനായ അരുണ് പ്രസാദാണ് മൊഴി രേഖപ്പെടുത്തിയത്. കേസില് അന്വേഷണം ഏറ്റെടുത്ത് മാസങ്ങള്ക്കിപ്പുറമാണ് മൊഴി രേഖപ്പെടുത്തുന്നത്.
ഇത് രണ്ടാം തവണയാണ് വീണയെ ചെന്നൈയിലേക്ക് വിളിച്ചുവരുത്തി ചോദ്യം ചെയ്യുന്നത്.
കഴിഞ്ഞ ജനുവരിയിലാണ് കേസില് എസ്എഫ്ഐഒ അന്വേഷണം പ്രഖ്യാപിച്ചത്. എക്സാലോജിക്കിന് മാസപ്പടിയായി പണം ലഭിച്ചുവെന്നായിരുന്നു ആരോപണം.
സി എം ആര് എല് വീണ വിജയന്റെ ഉടമസ്ഥതയിലുള്ള എക്സാലോജിക് സൊലൂഷ്യന്സ് എന്ന കമ്പനിക്ക് നല്കാത്ത സേവനത്തിന് 2017- 20 കാലയളവില് വലിയ തുക പ്രതിഫലം നല്കി എന്ന ഇന്ററിം സെറ്റില്മെന്റ് ബോര്ഡിന്റെ കണ്ടെത്തലാണ് മാസപ്പടി വിവാദത്തിന് തുടക്കമിട്ടത്. തുടര്ന്ന് കേന്ദ്ര ഏജന്സികള് അന്വേഷണം ഏറ്റെടുക്കുകയായിരുന്നു.
സി.എം.ആര്.എല്ലില്നിന്ന് കൈപ്പറ്റിയ പണത്തിന് വീണ ഐ.ജി.എസ്.ടി. അടച്ചതായി നികുതി വകുപ്പിന്റെ കണ്ടെത്തലും പുറത്ത് വന്നിരുന്നു.
