ആലപ്പുഴ: ചെങ്ങന്നൂര് ആലായില് വിദ്യാര്ത്ഥികളുമായി പോയ സ്കൂള് ബസിന് തീപിടിച്ചു. ബസിന്റെ മുന്വശത്തുനിന്ന് പുക ഉയരുന്നത് കണ്ട് ഉടന്തന്നെ കുട്ടികളെ പുറത്തിറക്കിയതിനാല് വലിയ അപകടമാണ് ഒഴിവായത്.
ഇന്ന് രാവിലെ 8.45-നായിരുന്നു സംഭവം. ബസ് പൂര്ണമായും കത്തി നശിച്ചു. മാന്നാര് ശ്രീ ഭുവനേശ്വരി ഇംഗ്ലീഷ് മീഡിയം സ്കൂളിന്റെ ബസാണ് കത്തിയത്. ആലാ-കോടുകുളഞ്ഞി റോഡില് ആലാ ഗവണ്മെന്റ് ഹൈസ്കൂളിനു സമീപമായിരുന്നു അപകടം നടന്നത്.
17 കുട്ടികളാണ് ബസിലുണ്ടായിരുന്നത്. ചെങ്ങന്നൂരില് നിന്ന് എത്തിയ ഫയര്ഫോഴ്സ് ഉദ്യോഗസ്ഥരെത്തിയാണ് തീ അണച്ചത്. പോലീസും മോട്ടോര് വാഹന വകുപ്പ് ഉദ്യോഗസ്ഥരും ബസില് പരിശോധന നടത്തി.
വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
