HIGHLIGHTS : മാപ്പ്
ഗ്രഹങ്ങളുടെ ഗ്രഹണ മാത്സര്യത്തില്‍ വഴിതെറ്റിപ്പോയ ജീവിതവുമായി തടവറയില്‍ നിന്ന്
മാപ്പ് സുനില്‍
c 9545
ഒരു ഗദ്ഗദം നീ ചാലിച്ചു വെച്ചുവോ
നിന്റെ അറിയാതെയൊഴുകുന്ന കണ്ണുനീരില്‍,
നിന്റെ അറിയാതെ പൊഴിയുന്ന വാക്കുകളില്‍,
നമ്മളറിയാതെ പോയൊരു വര്‍ഷങ്ങളില്‍.
ക്ഷണിക മോഹങ്ങള്‍ കടം കൊണ്ട കാലത്ത്,
ദുരിതപര്‍വ്വങ്ങള്‍ പിന്‍പേ വലം വെച്ചു;
മഷിക്കറുപ്പിലും കറുത്തുപോയ് കണ്‍തടം ;
കൊടും വിഷാദത്തിലകപ്പെട്ട നാളുകള്‍-
ദിശയിറിയാതെ വലംചുറ്റി നമ്മളാ
രൗദ്ര സംസാര സാഗരത്തിരകളില്‍-
കൊടിയ വേഗത്തിലാഞ്ഞു വീശിയ
പടു നിരാശതന്‍ ചുഴലിക്കൊടുങ്കാറ്റില്‍-
തുഴ വീണു പോയെന്റെ കൊച്ചുവള്ളം
തുള വീണു പോയെന്റെ പാമരത്തില്‍ ,
അതികഠിന ദുരിതമയമാ ദിനങ്ങള്‍
അതിഘോര, മിന്നെന്റെയോര്‍മകളില്‍ !
മധുമദിര കേളികളികളില്‍ കാലിടറി
നിലതെറ്റി വീണുപോയ ഗാധതയില്‍
അടിയോടെ മോന്തി ഞാന്‍ കയ്പുനീര-
ന്നതി സുന്ദര ചില്ലു ചഷകങ്ങളില്‍-
നിഴലുകള്‍ പോലും പിണങ്ങിമാറി,
അതു നല്കിയറിവിന്റെ പുതിയ പാഠം
ഒരു നാളുമിനി ഞാന്‍ പിഴയ്ക്കുകില്ല,
പിഴയായ് സമര്‍പ്പിക്കാം ശിഷ്ടജന്മം.
ഇനിയില്ല, കാലുഷ്യ കന്മഷങ്ങള്‍
ഇനിയില്ല, വഴിവിട്ട രീതിയൊന്നും-
നിന്റെ കനവുകള്‍ ഞാനെന്നും ഒര്‍ത്തുവയ്ക്കാം;
കനിവിന്റെ കാലങ്ങളിനി പുലരും !
കരയുവാന്‍ നിനക്കുണ്ടെന്‍ ചുമലു രണ്ടും
കരയുവാനിടയില്ല മേലിലെന്നും,-
കരയേണ്ട നാളുകള്‍ കടന്നുപോയി,
കസവിടും നാളുകള്‍ ഞാന്‍ വാക്കുനല്‍കാം.
അതിദൂരമില്ലിനി പുലരിയാകാന്‍,
അരികെ നിന്‍ നിശ്വാസ നിസ്വനങ്ങള്‍,
അതിവേഗം ഗദ്ഗദഛായ മാറ്റി,
അതിലുണ്ടൊരലൗകീക സ്വപ്‌നലോകം.
