നിരൂപകനും വിഖ്യാത എഴുത്തുകാരനുമായ പ്രൊഫ. എം കെ സാനു അന്തരിച്ചു.98 വയസ്സായിരുന്നു. വീട്ടില് വെച്ച് വീണ് അദേഹത്തിന്റെ ഇടുപ്പെല്ലിന് പരുക്കുപറ്റിയിരുന്നു. ഇതെതുടര് ശസ്ത്രക്രിയക്ക് വിധേയനാക്കിയിരുന്നു. പിന്നീട് ആരോഗ്യനില വഷളാവുകയായിരുന്നു.കൊച്ചിയിലെ അമൃത ആശുപത്രിയില് വെച്ചായിരുന്നു അന്ത്യം.
അദ്ധ്യാപകന്, വാഗ്മി, എഴുത്തുകാരന്, ചിന്തകന് എന്നീ നിലകളിലും പ്രശസ്തനാണ് പ്രൊഫ. എം കെ സാനു
അതീവ സമ്പന്ന കൂട്ടുകുടുംബത്തില് ജനിച്ച എം കെ സാനു, അകാലത്തില് അച്ഛന് മരിച്ചതോടെ ദാരിദ്ര്യത്തിന്റെയും നിസ്സഹായതയുടെയും നിഴലിലായി. അവിടെ നിന്നാണ് അദ്ദേഹം സാഹിത്യ ലോകത്തും സാംസ്കാരിക മണ്ഡലത്തിലും നിറഞ്ഞത്. നാല് വര്ഷത്തോളം സ്കൂള് അധ്യാപനായി സേവനം അനുഷ്ഠിച്ചു. പിന്നീട് വിവിധ ഗവണ്മെന്റ് കോളേജുകളില് അധ്യാപക വൃത്തിയിലേര്പ്പെട്ടു. 1958ല് അഞ്ചു ശാസ്ത്ര നായകന്മാര് എന്ന ആദ്യഗ്രന്ഥം പ്രസിദ്ധീകരിച്ചു. 1960ല് വിമര്ശനഗ്രന്ഥമായ കാറ്റും വെളിച്ചവും പുറത്തിറങ്ങി.
1983ല് അധ്യാപനത്തില് നിന്ന് വിരമിച്ചു. 1986ല് പുരോഗമന സാഹിത്യസംഘം പ്രസിഡന്റായി. കോണ്ഗ്രസ് നേതാവ് എ എല് ജേക്കബിനെ പരാജയപ്പെടുത്തി 1987ല് എറണാകുളം നിയമസഭാ മണ്ഡലത്തില് നിന്ന് ഇടതുപക്ഷ സ്വതന്ത്രസ്ഥാനാര്ത്ഥിയായി മത്സരിച്ച് വിജയിച്ചു.
കര്മഗതി എന്നാണ് അദേഹത്തിന്റെ ആത്മകഥയുടെ പേര്. വിമര്ശനം, വ്യാഖ്യാനം, ബാലസാഹിത്യം, ജീവചരിത്രം തുടങ്ങി വിവിധ സാഹിത്യശാഖകളിലായി നാല്പതോളം കൃതികളുടെ കര്ത്താവാണ് എം.കെ. സാനു.
