തിരുവനന്തപുരത്ത് ശിശുക്ഷേമ സമിതിയില് രണ്ടര വയസുകാരിയോട് ക്രൂരത. കുട്ടിയുടെ ജനനേന്ദ്രിയത്തില് നഖം ഉപയോഗിച്ച് മുറിവേല്പ്പിച്ച ആയമാര് അറസ്റ്റില്. അജിത, മഹേശ്വരി, സിന്ധു എന്നീ ആയമാരെയാണ് പൊലീസ് അറസ്റ്റു ചെയ്തത്. കിടക്കയില് മൂത്രമൊഴിച്ചതിനാണ് കുട്ടിയെ ഉപദ്രവിച്ചതെന്ന് ശിശുക്ഷേമ സമിതി ജനറല് സെക്രട്ടറി പൊലീസിന് നല്കിയ പരാതിയില് പറയുന്നു.
ആയമാര്ക്കെതിരെ പോക്സോ നിയമപ്രകാരം കേസെടുത്തു. കുഞ്ഞിനെ ഉപദ്രവിച്ചതിനും ഉപദ്രവിച്ച കാര്യം മറച്ചു വച്ചതിനുമാണ് കേസ്. അജിത എന്ന ആയയാണ് കുഞ്ഞിനെ മുറിവേല്പ്പിച്ചത്. മറ്റ് രണ്ടുപേര് ഇക്കാര്യം അറിഞ്ഞിട്ടും മറച്ചുവെച്ചെന്നാണ് വിവരം.
സ്ഥാപനത്തിലെ മറ്റൊരു ആയ കുട്ടിയെ കുളിപ്പിക്കുന്ന സമയത്താണ് തന്റെ സ്വകാര്യഭാഗ്യങ്ങളില് വേദനയുണ്ടെന്ന കാര്യം കുട്ടി തുറന്നു പറഞ്ഞത്. അങ്ങനെയാണ് തൈക്കാട് കുട്ടികളുടെ ആശുപത്രിയില് എത്തിച്ച് പരിശോധന നടത്തിയത്. പരിശോധനയില് ജനനേന്ദ്രിയ ഭാഗത്ത് മുറിവുള്ളതായി കണ്ടെത്തി. തുടര്ന്ന് നടത്തിയ അന്വേഷണത്തിലാണ് ക്രൂരതയുടെ വിവരം പുറത്തറിഞ്ഞത്.
അതേസമയം, ശിശുക്ഷേമ സമിതിയില് രണ്ടര വയസ്സുകാരിയുടെ ജനനേന്ദ്രിയത്തില് ആയമാര് മുറിവേല്പിച്ചത് ഒറ്റപ്പെട്ട സംഭവമെന്ന് ശിശുക്ഷേമസമിതി ജനറല് സെക്രട്ടറി അരുണ് ഗോപി. നഖം കൊണ്ട് നുള്ളിയ ഒരു ചെറിയ പാട് മാത്രമാണ് കുട്ടിയുടെ ജനനേന്ദ്രിയത്തിലുള്ളതെന്നും കുറ്റം ചെയ്ത ആയമാര്ക്കെതിരെ നടപടി സ്വീകരിച്ചുവെന്നും അരുണ്ഗോപി മാധ്യമങ്ങളോട് പറഞ്ഞു. ആയമാര് താത്കാലിക ജീവനക്കാരാണെന്നും അരുണ് ഗോപി.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ലിങ്കില് ക്ലിക്ക് ചെയ്യു
