HIGHLIGHTS : Bollywood actress Shefali Jariwala passes away
മുംബൈ: ‘കാന്താ ലഗാ’ ഐക്കണിക്ക് മ്യൂസിക് വീഡിയോയിലൂടെ പ്രശസ്തയായ നടിയും മോഡലുമായ ഷെഫാലി ജരിവാല (42) ഹൃദയാഘാതത്തെ തുടര്‍ന്ന് അന്തരിച്ചു. കുഴഞ്ഞുവീണതിനെ തുടര്‍ന്ന് ജൂണ്‍ 27-ന് വെള്ളിയാഴ്ച രാത്രി മുംബൈയിലെ ബെല്ലെവ്യൂ മള്‍ട്ടി-സ്‌പെഷ്യാലിറ്റി ആശുപത്രിയില്‍ എത്തിച്ചെങ്കിലും ഡോക്ടര്‍മാര്‍ മരണം സ്ഥിരീകരിക്കുകയായിരുന്നു. ഷെഫാലിയുടെ ഭര്‍ത്താവും നടനുമായ പരാഗ് ത്യാഗിയും ചിലരും ചേര്‍ന്നാണ് നടിയെ ആശുപത്രിയില്‍ എത്തിച്ചത്. മൃതദേഹം പോസ്റ്റ്‌മോര്‍ട്ടത്തിനായി കൂപ്പര്‍ ആശുപത്രിയിലേക്ക് മാറ്റി.
2002-ല്‍ പുറത്തിറങ്ങിയ ‘കാന്താ ലഗാ’ എന്ന റീമിക്‌സ് മ്യൂസിക് വീഡിയോയിലൂടെ ”കാത്താ ലഗാ’ ഗേള്‍’ എന്ന പേര് നേടിയ ഷെഫാലി. ഈ ആല്‍ബം വന്‍ ഹിറ്റായതോടെ പ്രേക്ഷകരുടെ ഹൃദയത്തില്‍ ഇടംനേടി. 2000-കളുടെ തുടക്കത്തില്‍ പോപ്പ് സംസ്‌കാരത്തിന്റെ ഒരു പ്രതീകമായി മാറിയ ഈ വീഡിയോ, ഷെഫാലിയെ ഒരു ദേശീയ താരമാക്കി.
പിന്നീട്, 2004-ല്‍ സല്‍മാന്‍ ഖാന്‍, അക്ഷയ് കുമാര്‍, പ്രിയങ്ക ചോപ്ര എന്നിവര്‍ അഭിനയിച്ച ‘മുജ്‌സെ ഷാദി കരോഗി’ എന്ന ചലച്ചിത്രത്തില്‍ ഒരു ക്യാമിയോ വേഷത്തില്‍ അവര്‍ പ്രത്യക്ഷപ്പെട്ടു. 2019-ല്‍ ഷെഫാലി ‘ബിഗ് ബോസ് 13’ എന്ന റിയാലിറ്റി ഷോയില്‍ പങ്കെടുത്തതോടെ വീണ്ടും ശ്രദ്ധ നേടി.
ഈ ഷോയില്‍, മുന്‍ കാമുകനായിരുന്ന സിദ്ധാര്‍ത്ഥ് ശുക്ലയുമായുള്ള ബന്ധം ഏറെ ചര്‍ച്ചയായി. ‘നാച് ബലിയേ’ 5, 7 എന്നീ ഡാന്‍സ് റിയാലിറ്റി ഷോകളിലും ഭര്‍ത്താവ് പരാഗിനൊപ്പം ഷെഫാലി പങ്കെടുത്തിരുന്നു. 2019-ല്‍ ‘ബേബി കം നാ’ എന്ന വെബ് സീരീസിലും അവര്‍ പ്രത്യക്ഷപ്പെട്ടു.
ഷെഫാലിയുടെ മരണകാരണം പോസ്റ്റ്‌മോര്‍ട്ടം റിപ്പോര്‍ട്ടിന് ശേഷം മാത്രമേ സ്ഥിരീകരിക്കപ്പെടുകയുള്ളൂ. മുംബൈ പോലീസ് അവരുടെ അന്ധേരിയിലെ വസതിയില്‍ പരിശോധന നടത്തിയിട്ടുണ്ട്. ഒപ്പം ഒരു ഫോറന്‍സിക് ടീമും സ്ഥലത്ത് പരിശോധന നടത്തി.
മലബാറി ന്യൂസ് വാട്‌സ്ആപ്പ് ഗ്രൂപ്പില്‍ അംഗമാവാന്‍ ഈ
ലിങ്കില്‍ ക്ലിക്ക് ചെയ്യു
