HIGHLIGHTS : റിയാസിനെതിരായ അധിക്ഷേപത്തില് മാപ്പ് പറഞ്ഞ് അബ്ദുറഹ്മാന് കല്ലായി
കോഴിക്കോട് :മുസ്ലിം ലീഗിന്റെ വഖഫ് സംരക്ഷണ റാലിക്കിടെ പൊതുമരാമത്ത് വകുപ്പ് മന്ത്രി മുഹമ്മദ് റിയാസിനെ എതിരെ നടത്തിയ അധിക്ഷേപ പരാമര്ശത്തില് മാപ്പ് പറഞ്ഞ് സംസ്ഥാന സെക്രട്ടറി അബ്ദുറഹ്മാന് കല്ലായി.വ്യക്തിജീവിതത്തിലെ മതപരമായ കാഴ്ചപ്പാടാണ് താന് പ്രസംഗത്തില് സൂചിപ്പിക്കാന് ശ്രമിച്ചതെന്ന് അദ്ദേഹം വ്യക്തമാക്കി. മന്ത്രി റിയാസിനെതിരായ പരാമര്ശത്തില് താന് നിര്വ്യാജം ഖേദം പ്രകടിപ്പിക്കുന്നതായി അദ്ദേഹം പുറത്തിറക്കിയ പത്ര കുറിപ്പില് പറഞ്ഞു.
റിയാസിന്റേത് വിവാഹമല്ല, വ്യഭിചാരം ആണെന്നായിരുന്നു സെക്രട്ടറിയുടെ വിവാദമായ പരാമര്ശം.
‘മുന് ഡിവൈഎഫ്ഐ അഖിലേന്ത്യാ പ്രസിഡന്റ് പുതിയാപ്പിളയാണ്. എന്റെ നാട്ടിലെ പുതിയാപ്ല ആണ് ആടോ ഭാര്യ…ഇത് വിവാഹമാണോ. വ്യഭിചാരമാണ്.സിനയാണത്(അറബി പദം). അത് പറയാന് തന്റേടം വേണം.സിഎച്ച് മുഹമ്മദ് കോയയുടെ നട്ടെല്ല് നമ്മള് ഉപയോഗിക്കണം’. അബ്ദുറഹ്മാന് കല്ലായി പറഞ്ഞു.
സ്വവര്ഗരതിക്ക് നിയമ പ്രാബല്യം കൊണ്ടുവരണമെന്ന് പറയുന്നവരാണ് കമ്മ്യൂണിസ്റ്റ് പാര്ട്ടികള്. അവരുടെ പ്രകടന പത്രികയില് അതിനെക്കുറിച്ച് പറയുന്നുണ്ട്.
ഉഭയകക്ഷി സമ്മതപ്രകാരം ലൈംഗിക സ്വാതന്ത്ര്യത്തിനുള്ള ‘വിഡ്ഢിത്തം’ സുപ്രീം കോടതി പ്രഖ്യാപിച്ചപ്പോള് അതിനെ ആദ്യം സ്വാഗതം ചെയ്തത് ഡി.വൈ.എഫ്.ഐയാണെന്ന് കമ്മ്യൂണിസ്റ്റുകാരെ പിന്തുണക്കുന്നവര് ചിന്തിക്കണമെന്നും അദ്ദേഹം പറഞ്ഞു.
ഇ.എം.എസും എ.കെ.ജിയും ഇല്ലാത്ത സ്വര്ഗം ഞങ്ങള്ക്ക് വേണ്ട എന്ന് പറയുന്നവരെ കണ്ടിട്ടുണ്ട്. അങ്ങനെ പറയുന്നവര് കാഫിറുകളാണ്. ലീഗ് എന്നും സമുദായത്തിനൊപ്പം നിന്ന പാര്ട്ടിയാണ്. ആയിരം പിണറായി വിജയന്മാര് ഒരുമിച്ച് ശ്രമിച്ചാലും മുസ്ലിം ലീഗിന്റെ അഭിമാനം നശിപ്പിക്കാന് കഴിയില്ലെന്നും അബ്ദുറഹ്മാന് കല്ലായി പറഞ്ഞു.