തെക്കൻ ഫിലിപ്പീൻസിലെ ബാസിലാൻ പ്രവിശ്യയ്ക്ക് സമീപം 350-ലധികം യാത്രക്കാരുമായി പോയ ഫെറി മുങ്ങി 18 പേർ മരിച്ചു. തിങ്കളാഴ്ച പുലർച്ചെയായിരുന്നു ദാരുണമായ ഈ അപകടം നടന്നത്. എം/വി തൃഷ കെർസ്റ്റിൻ 3 എന്ന ഫെറിയാണ് അപകടത്തിൽപ്പെട്ടത്. ഇതുവരെ 316 പേരെ രക്ഷപ്പെടുത്തിയതായി ഫിലിപ്പീൻസ് കോസ്റ്റ് ഗാർഡ് അറിയിച്ചു. കാണാതായ 28 പേർക്കായി തിരച്ചിൽ ഊർജ്ജിതമായി തുടരുകയാണ്.
സാംബോംഗ സിറ്റിയിൽ നിന്ന് സുലു പ്രവിശ്യയിലെ ജോലോ ദ്വീപിലേക്ക് പോവുകയായിരുന്നു ഫെറി. പുലർച്ചെ 1:50-ഓടെയാണ് കപ്പലിൽ നിന്ന് അപായ സന്ദേശം ലഭിച്ചത്. ബാസിലാൻ പ്രവിശ്യയിലെ ബാലുക്ക്-ബാലുക്ക് ദ്വീപിന് ഏകദേശം അഞ്ച് കിലോമീറ്റർ കിഴക്കായി ഫെറി മുങ്ങുകയായിരുന്നു. കപ്പലിൽ 332 യാത്രക്കാരും 27 ജീവനക്കാരുമാണ് ഉണ്ടായിരുന്നതെന്ന് ഔദ്യോഗിക രേഖകൾ വ്യക്തമാക്കുന്നു. കാലാവസ്ഥ അനുകൂലമായിരുന്നിട്ടും പെട്ടെന്നുണ്ടായ സാങ്കേതിക തകരാറാണ് അപകടത്തിന് കാരണമെന്നാണ് പ്രാഥമിക നിഗമനം.
കോസ്റ്റ് ഗാർഡ്, നാവികസേന, വ്യോമസേന എന്നിവയുടെ കപ്പലുകളും വിമാനങ്ങളും സംയുക്തമായാണ് രക്ഷാപ്രവർത്തനം നടത്തുന്നത്. ഒരു ബ്ലാക്ക് ഹോക്ക് ഹെലികോപ്റ്ററും നിരീക്ഷണ വിമാനവും തിരച്ചിലിനായി രംഗത്തുണ്ട്. ഇതിനുപുറമെ പ്രദേശത്തെ മത്സ്യബന്ധന ബോട്ടുകളും രക്ഷാപ്രവർത്തനത്തിൽ പങ്കുചേരുന്നുണ്ട്. രക്ഷപ്പെടുത്തിയവരെയെല്ലാം സമീപത്തെ ഇസബെല സിറ്റിയിലേക്കും സാംബോംഗയിലേക്കും മാറ്റി. പരിക്കേറ്റവർക്ക് ആവശ്യമായ ചികിത്സ ലഭ്യമാക്കാൻ പ്രദേശത്തെ ആശുപത്രികളിൽ പ്രത്യേക ക്രമീകരണങ്ങൾ ഏർപ്പെടുത്തിയിട്ടുണ്ടെന്ന് ബാസിലാൻ ഗവർണർ മുജീബ് ഹതാമൻ അറിയിച്ചു.
കപ്പലിൽ പരിധിയിൽ കൂടുതൽ യാത്രക്കാരെ കയറ്റിയിരുന്നില്ലെന്ന് അധികൃതർ വ്യക്തമാക്കി. വാഹനങ്ങൾ ഉറപ്പിച്ചിരുന്ന ഹാർനെസ് പൊട്ടിയതാണ് കപ്പൽ ചെരിയാൻ കാരണമായതെന്ന് ചില ജീവനക്കാർ മൊഴി നൽകിയിട്ടുണ്ട്. അപകടത്തെക്കുറിച്ച് വിശദമായ സമുദ്ര അപകട അന്വേഷണം നടത്തുമെന്ന് കോസ്റ്റ് ഗാർഡ് കമാൻഡർ റോമൽ ദുവ അറിയിച്ചു.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ഈ ലിങ്കില് ക്ലിക്ക് ചെയ്യു
