മനാമ:പശ്ചിമേഷ്യന് സംഘര്ഷത്തെത്തുടര്ന്ന് താല്ക്കാലികമായി അടച്ചിട്ടിരുന്ന വ്യോമപാത തുറന്ന് ബഹ്റൈന്. വിമാന സര്വീസുകള് പുനരാരംഭിക്കാന് സിവില് ഏവിയേഷന് കാര്യാലയത്തിന്റെ അനുമതി ലഭിച്ചതിനു പിന്നാലെയാണ് നടപടി.
ഉയര്ന്ന സുരക്ഷാ മാനദണ്ഡങ്ങള് പാലിച്ച് വിമാന ഗതാഗതം സുഗമമായി നടത്തുന്നതിന് സിവില് ഏവിയേഷന് അതോറിറ്റി പ്രതിജ്ഞാബദ്ധമാണെന്ന് സിവില് ഏവിയേഷന് കാര്യാലയം വ്യക്തമാക്കി. വിമാനയാത്രക്കാരുടെയും വിമാനങ്ങളുടെയും സുരക്ഷ ഉറപ്പാക്കാനായി ബന്ധപ്പെട്ട മറ്റ് അധികാരികളുമായി ചേര്ന്ന് നിരന്തരമായ ഏകോപനം തുടര്ന്നുവരികയാണെന്നും അറിയിച്ചു.
ഉയര്ന്ന സുരക്ഷാ മാനദണ്ഡങ്ങള് പാലിച്ച് വിമാന സര്വീസുകള് സുഗമമായി നടത്തുന്നതിന് എല്ലാ സജ്ജീകരണങ്ങളും ഒരുക്കിയിട്ടുണ്ട്. വ്യോമപാത തുറന്നതോടെ കുടുങ്ങിക്കിടക്കുന്ന വിമാന സര്വീസുകള് ഉടന് തന്നെ സാധാരണ നിലയിലാകുമെന്നാണ് പ്രതീക്ഷിക്കുന്നത്.
മേഖലയില് ഇറാന്റെ മിസൈല്-ഡ്രോണ് ആക്രമണങ്ങള് രൂക്ഷമായ പശ്ചാത്തലത്തില് മുന്കരുതല് നടപടിയെന്ന നിലയിലാണ് വ്യോമപാത താല്ക്കാലികമായി അടച്ചിരുന്നത്. സുരക്ഷാ സാഹചര്യങ്ങള് വിലയിരുത്തിയ ശേഷമാണ് ഇപ്പോള് നിയന്ത്രണങ്ങള് നീക്കിയത്.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ഈ ലിങ്കില് ക്ലിക്ക് ചെയ്യു
