സ്വന്തം ലേഖകന്
പ്രകൃതിഭംഗി കൊണ്ടും സവിശേഷമായ കാലാവസ്ഥ കൊണ്ടും സഞ്ചാരികളെ ആകര്ഷിക്കുന്ന ഒരു മനോഹര ഗ്രാമമാണ് വട്ടവട.മൂന്നാറില് നിന്നും ഏകദേശം 45 കിലോമീറ്റര് അകലെയായാണ് വട്ടവട സ്ഥിതി ചെയ്യുന്നത്.
മറ്റ് വിനോദ സഞ്ചാര കേന്ദ്രങ്ങളെ അപേക്ഷിച്ച് വട്ടവടയുടെ പ്രധാന ആകര്ഷണം അവിടുത്തെ പച്ചക്കറി ഗ്രാമങ്ങളാണ്. കേരളത്തിലെ ഒട്ടുമിക്ക സ്ഥലങ്ങളിലും കുന്നിന്ചെരിവുകളില് തേയിലത്തോട്ടങ്ങള് കാണുമ്പോള്, വട്ടവടയില് കാണാന് സാധിക്കുക തട്ടുതട്ടുകളായുള്ള പച്ചക്കറിപ്പാടങ്ങളാണ്. ക്യാബേജ്, കാരറ്റ്, വെളുത്തുള്ളി, ഉരുളക്കിഴങ്ങ്, ബീന്സ് എന്നിവ ഇവിടെ വ്യാപകമായി കൃഷി ചെയ്യുന്നു.
കൂടാതെ പഴവര്ഗ്ഗങ്ങളുടെ നാട് കൂടിയാണ് വട്ടവട.സ്ട്രോബെറി, ആപ്പിള്, പ്ലംസ്, പീച്ച്, പാഷന് ഫ്രൂട്ട് തുടങ്ങിയ വൈവിധ്യമാര്ന്ന പഴങ്ങള് വിളയുന്ന ഇടമാണിത്. പ്രകൃതിദത്തമായ പഴങ്ങളും ജാമുകളും ഇവിടെ നിന്നും വാങ്ങാന് സാധിക്കും.
ഇതിനെല്ലാം പുറമെ ഇവിടുത്തെ തനത് സംസ്കാരവും ഗ്രാമീണ ഭംഗിയും ഏതൊരു സഞ്ചാരിയുടെയും മനസ് കീഴടക്കുന്ന ഒന്നാണ്. തമിഴ് സംസ്കാരത്തോട് ഏറെ അടുത്തുനില്ക്കുന്നതാണ് ഇവിടുത്തെ ജനജീവിതം. മണ്ചുവരുകളും പുല്ലുമേഞ്ഞ മേല്ക്കൂരകളുമുള്ള പരമ്പരാഗത വീടുകള് ഇവിടുത്തെ പ്രത്യേകതയാണ്.
മറ്റൊരു ആകര്ഷണം ഇവിടുത്തെ ട്രെക്കിംഗും ക്യാമ്പിംഗുമാണ്. സാഹസികപ്രിയര്ക്കായി നിരവധി ട്രെക്കിംഗ് പാതകള് വട്ടവടയിലുണ്ട്. രാത്രികാലങ്ങളില് ടെന്റുകളിലുള്ള ക്യാമ്പിംഗും ബോണ്ഫയറും ഇവിടുത്തെ പ്രധാന ആകര്ഷണമാണ്.
കൂടാതെ ഫാം ടൂറിസത്തിനും ഏറെ പേരുകേട്ട ഇടം കൂടിയാണ് ഇവിടം. പച്ചക്കറി-പഴത്തോട്ടങ്ങളിലൂടെ നടക്കാനും, കൃഷിരീതികള് നേരിട്ട് കാണാനും, കര്ഷകരുമായി സംവദിക്കാനുമുള്ള അവസരം സഞ്ചാരികള്ക്ക് ലഭിക്കും
ഇനി എങ്ങനെ ഈ മനോഹരമായ ഗ്രാമത്തിലേക്ക് എത്തിച്ചേരാം എന്ന് അറിയേണ്ടേ
മൂന്നാറില് നിന്നും മാട്ടുപ്പെട്ടി ഡാം, ടോപ്പ് സ്റ്റേഷന്, പാമ്പാടുംചോല നാഷണല് പാര്ക്ക് എന്നിവ കടന്നാണ് വട്ടവടയിലേക്ക് പോകുന്നത്. ഈ യാത്ര തന്നെ അതിമനോഹരമായ ഒരു അനുഭവമാണ്.
ഏറ്റവും അടുത്തുള്ള റെയില്വേ സ്റ്റേഷന്: ആലുവ (ഏകദേശം 150 കി.മീ), ഉദുമല്പേട്ട് (തമിഴ്നാട് – ഏകദേശം 130 കി.മീ).
ഏറ്റവും അടുത്തുള്ള എയര്പോര്ട്ട്: കൊച്ചി അന്താരാഷ്ട്ര വിമാനത്താവളം (നെടുമ്പാശ്ശേരി).
വട്ടവട സന്ദര്ശിക്കാന് അനുയോജ്യമായ സമയം സെപ്റ്റംബര് മുതല് ഏപ്രില് വരെയുള്ള മാസങ്ങളാണ് .ശീതകാലത്ത് കടുത്ത തണുപ്പായിരിക്കും ഇവിടെ അനുഭവപ്പെടുക.
താമസത്തിനായി നിരവധി ഹോംസ്റ്റേകളും റിസോര്ട്ടുകളും ക്യാമ്പിംഗ് സൈറ്റുകളും വട്ടവടയില് ലഭ്യമാണ്.
കൂടുതല് തിരക്കുകളൊന്നുമില്ലാത്ത, പ്രകൃതിയോട് ഇണങ്ങിനില്ക്കുന്ന ശാന്തമായ ഒരു യാത്രയാണ് നിങ്ങള് ആഗ്രഹിക്കുന്നതെങ്കില് വട്ടവട നിങ്ങള്ക്ക് ഏറ്റവും മികച്ച ചോയ്സ് ആയിരിക്കുമെന്ന കാര്യത്തില് ഒരു തകര്ക്കവുമില്ല.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ഈ ലിങ്കില് ക്ലിക്ക് ചെയ്യു
