ന്യൂജേഴ്സി: ബ്രസീലിയന് സൂപ്പര് താരം നെയ്മര് അന്താരാഷ്ട്ര ഫുട്ബോളില് നിന്നും വിരമിക്കല് പ്രഖ്യാപിച്ചു. ഫിഫ ലോകകപ്പിന്റെ പ്രീക്വാര്ട്ടറില് നോര്വേയോട് ബ്രസീല് തോറ്റു പുറത്തായതിന് തൊട്ടുപിന്നാലെയാണ് 34-കാരനായ താരം വിരമിക്കല് പ്രഖ്യാപിച്ചത്. 2010-ല് തന്റെ പതിനെട്ടാം വയസ്സില് ദേശീയ ടീമിനായി മഞ്ഞക്കുപ്പായത്തിൽ അരങ്ങേറ്റം കുറിച്ച താരം നീണ്ട 16 വർഷത്തെ കരിയറിനാണ് അന്ത്യം കുറിക്കുന്നത്. ‘ഞാൻ ശ്രമിച്ചു, ഇവിടെയാണ് (മെറ്റ്ലൈഫ് സ്റ്റേഡിയം) എല്ലാം തുടങ്ങിയയത്, ഇവിടെ തന്നെ എല്ലാം അവസാനിപ്പിക്കുന്നു’ മത്സരശേഷം മാധ്യമങ്ങളോടായി താരം പറഞ്ഞു. ബ്രസീലിയന് പുരുഷ ഫുട്ബോള് ടീമിനായി ഏറ്റവുമധികം ഗോളുകള് നേടിയ താരം എന്ന ചരിത്രനേട്ടം സ്വന്തമാക്കിയാണ് നെയ്മര് പടിയിറങ്ങുന്നത്.
129 മത്സരങ്ങളില് നിന്ന് 80 ഗോളുകളാണ് താരം സ്വന്തം പേരില് കുറിച്ചത്. ബ്രസീലിയന് ഫുട്ബോളിന്റെ ചരിത്രത്തില് പെലെ അടക്കമുള്ള ഇതിഹാസങ്ങള്ക്കൊപ്പം തന്റേതായ സ്ഥാനം ഉറപ്പിച്ചാണ് നെയ്മര് കളം വിടുന്നത്. നാല് ലോകകപ്പുകളില് ബ്രസീലിന്റെ കുപ്പായമണിഞ്ഞ താരം, ടീമിന് വേണ്ടി നിര്ണ്ണായകമായ പല നിമിഷങ്ങളിലും കരുത്തായി നിന്നു.
രാജ്യത്തിനായി വലിയൊരു സ്വപ്നം സാക്ഷാത്കരിക്കാന് നെയ്മറിനായി. 2012 ലണ്ടന് ഒളിമ്പിക്സില് വെള്ളി മെഡല് നേടിയ ടീമിലുണ്ടായിരുന്ന താരം, 2016-ല് സ്വന്തം നാട്ടില് വെച്ച് നടന്ന റിയോ ഒളിമ്പിക്സില് ബ്രസീലിനെ സ്വര്ണ മെഡല് ജേതാക്കളാക്കുന്നതില് പ്രധാന പങ്കുവഹിച്ചു.
2026 ഫിഫ ലോകകപ്പില് രണ്ട് മത്സരങ്ങളില് മാത്രമാണ് നെയ്മര്ക്ക് ബൂട്ടണിയാന് സാധിച്ചത്. പരിക്കിന്റെയും മറ്റും അലട്ടലുകള്ക്കിടയിലും ഗ്രൂപ്പ് ഘട്ടത്തില് സ്കോട്ട്ലന്ഡിനെതിരായ മത്സരത്തില് പകരക്കാരനായി കളത്തിലിറങ്ങിയ നെയ്മര്, പ്രീക്വാര്ട്ടറില് നോര്വേയ്ക്കെതിരെ നടന്ന മത്സരത്തില് ഇഞ്ചുറി ടൈമില് പെനാല്റ്റിയിലൂടെ ഒരു ഗോള് കൂടി നേടിയിരുന്നു. ഇതാണ് ബ്രസീലിന് വേണ്ടിയുള്ള താരത്തിന്റെ അവസാന ഗോളായി മാറിയത്.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ഈ ലിങ്കില് ക്ലിക്ക് ചെയ്യു
